[walaa farouk]

من صغري كنت بستني العيد من السنة للسنة وقبلها بأكتر من شهر
بفضل اعمل عد تنازلي واحسب فاضل كام يوم بالظبط علي العيد
و لازم انزل اجيب لبس العيد وانقي احسن حاجة
واركز ازاي هبقي مميز و ملفت يوم العيد ,,, و يومها ببقي فرحان جدا
عشان هقابل صحابي وهنتجمع ما هو دة يوم الخروجة اللي بنرتبلها بقالنا شهور !!
و الحقيقة إني كنت غالبا مش بفرح و بيعدي العيد و انا محبط جدا
لأني عمري ما فهمت معنى العيد الحقيقي ..

كل ما اقابل حد اقولة كل سنة وانت طيب واعيد علية ...
بس الحقيقة اني عمري ما عيدت علي صاحب العيد ولا قلتلة كل سنة وانت طيب
ومكنش بيمثلي اي حاجة غير اني انا عايز انبسط البس جديد
اكل كتير اخرج اشرب بس نسيت اصلا العيد لية ولمين!؟ كنت بروح الكنيسة
والبس أغلى و أشيك طقم واظهر بأحسن صورة عشان الناس ..
و لازم اتطمن إن أحلى أكل موجود في البيت عشان نفسي ... طيب و هو فين من كل ده ؟؟

يعني ربنا يسوع هو صاحب العيد وهو مجاش علي بالي خالص من كل دة !!
طفل نايم في المزود الله بنفسه إتنازل و جاي عشاني
و مهتمش يلبس لبس ملوك أو ياكل أكل ملوك أو يعيش في قصر .
. و انا برضه مش مشغول بية وسايبة ومشغول بنفسي وبالناس...

ناس كتير اوي كدة !! عشان كدة قررت السنة دي اغير مفهومي عن العيد برضة
وهفرح اكتر من كل السنة عشان الفرحة المرة دي بإنة جة ليا
وعلشاني و دي فرحة تتولد معاه في العيد و تستمر معايا علطول ..
عيد ميلاد يسوع .. أعظم مناسبة عيد ميلاد في التاريخ