[walaa farouk]

"الذين يقفزون من فوق العتبة"



-في سفر صفنيا الاصحاح الاول استوقفتني الآية دي: "
و في ذلك اليوم اعاقب كل الذين يقفزون من فوق العتبة،
الذين يملأون بيت سيدهم ظلماً و غشاً" (صف ١: ٩)

-يعني ايه مشكلة اللي بينطوا من فوق العتبة معاك يا رب.
..يعني خلصت كل الخطايا عشان تبقي دي خطية فظيعة يُعاقَبوا عليها؟!!

-لقيت ربنا بيقول لي لأ طبعاً عندي مشكلة و مشكلة كبيرة كمان معاهم!!!

-تعالوا نرجع للخلفية التاريخية للموضوع، في سفر صموئيل الاول اصحاح ٥.
..اللي حصل ان وجود "تابوت العهد"(الله) في بيت الصنم "داجون"،
خلي داجون "يقع علي عتبة بيته" و رأسه تكون مفصولة عن جسمه.
..فالكهنة بتوع داجون و كل اللي بيدخلوا المعبد بتاعه بقوا بعد كدة "يقفزوا" من فوق العتبة
و هما داخلين و خارجين عشان المكان الطاهر اللي داجون اتقطعت فيه رأسه..

-اللي حصل كمان، ان مع مرور الوقت و نسيان القصة الاصلية لحركة القفز فوق العتبة
، بقي في شوية من شعب الله بيعملوا الحركة دي و هم مش فاهمين حاجة.
..ماتفهمش بقي كانوا فاكرينها روشّنة و لا بيتفائلوا و يتشائموا بها..
.الله اعلم كان ايه بيدور في عقلهم وقتها 😅

-احنا كمان "بنقفز فوق العتبة" لما بنمشي وراء التيار و بنتوه عن الحق
...احنا كمان "بنقفز فوق العتبة" لما نبقي "معاهم معاهم، عليهم عليهم" في الحكم علي الآخرين
...احنا كمان "بنقفز فوق العتبة" لما بنتصرف بدون بساطة قلب في التعامل
و نكتفي فقط بحكمة الحية و ننسي بساطة الحمامة
...احنا كمان "بنقفز فوق العتبة" لما بنقلد العالم في طريقة الكلام و التصرفات
و بنكون فاكرينها رُقي او ذكاء اجتماعي..
.احنا كمان "بنقفز فوق العتبة" لما بننسي نشوف تعاليم الله و بنمشي وراء تعاليم داجون و احنا مش فاهمين او فاهمين بس عاملين نفسنا لا فاهمين و لا فاكرين.
..احنا كمان "بنقفز فوق العتبة" لما بنقلل من قيمتنا و جمالنا
و نبحث عنهم من خلال لفت النظر و احنا "بنقفز" بدون وعي و لا تفكير في اللي بنعمله!!

-النهاردة صفنيا (معني اسمه الله يَستُر)، جاي بيقول لي و بيقول لك؛ الله يسترك يا بني/بنتي

ماتقفزش من فوق العتبة ل رقبتك تتكسر زي داجون!

#مش_كل_القفز_رياضة 😂
#الله_يستر