[walaa farouk]

جرَّبت تقع في ضيقة واحتياج ..
ملوش حل غير تغيير جذري في حياتك؟
جرَّبت تبذل كل مجهود وتخبَّط على كل باب ..
ممكن يكون فيه حل ونجاة ليك من الغرق؟
جرَّبت في كل مرة، مهما بذلت من مجهود ..
تفشل وتتكسر وتُحبَط من كتر المحاولة والفشل؟
جرَّبت تصلِّي للموضوع بانكسار ولجاجة ..
بدون ما تشوف أي تغيير في أرض الواقع؟
جرَّبت تدخل في بوادر اكتئاب بسبب الضيقة ..
ومتبقاش قادر تتكلِّم ولا تفكَّر ولا تتصرَّف؟
جرَّبت تبقى مش انت من كتر ما الفشل شوِّه في نفسيِّتَك ..
ومتبقاش عارف تخرج من دايرة الإحباط؟
جرَّبت تصارع بين الاستمرار في الصلاة، بلا استجابة ..
أو الكَفّ عن الصلاة، بسبب عدم الاستجابة؟
جرَّبت على الرغم من كل ده، متقدرش تبكي ..
لأن اللي حواليك بيستمدُّوا قوّتهم منك؟
جرَّبت ميبقاش عندك رفاهية التراجع ..
لأن المسؤولين منك، مش هينفع يكمِّلوا من غيرك؟
أرجوك لو مجرَّبتش الحاجات دي ..
متوعظنيش عن الإيمان والثقة ..
ومتلومنيش على اليأس وانعدام الثقة ..
وافتكر ان الشعب المذلول من فرعون في أرض العبوديَّة ..
مقدِرش يصدَّق موسى لما قال ان فيه خلاص وتحرير ..
[من صِغَر النَّفس ومن العُبوديَّة القاسية] خروج 9:6
وافهم ان ألمي وانكساري أرض مُقدَّسة ..
مينفعش تدوسها برجليك من غير ما تحِس بيَّ ..
واياك تدوسني برجليك، أكتر ما ظروفي دايسة عليَّ!