[walaa farouk]

ليه بيجي في الآخر.. ؟؟



و انت بتدور علي ورقة ضايعة، غالباً بتلاقيها آخر ورقة دورت عليها.
. و انت كمان بتجرب مفاتيح كتير ،
غالباً برضه آخر مفتاح في سلسلة المفاتيح هو اللي بيفتح..

ده لأنك جايز متوتر ، أو ربما مجرد صدفة ..

لكن عند ربنا مفيش صدف.. هو متعود يجي في آخر لحظة
، بعد ما تكون جربت و حاولت و تعبت ..

ممكن علشان يعرفك أن عقلك و معارفك ووسايطك و عزوتك مش نافعة ..

ممكن كمان علشان يعرفك انه قفل لك أبواب كنت مصمم عليها

و كانت ح تتعبك ، فتعرف بعدين أن الباب اللي فتحه ليك هو الأنسب..

و كمان لما الحل بيجي متأخر تبقي خدت بركات اهم من حل المشكلة :

بركة الصلاة و الصبر و الشكر ..

كمان الفرحة بتبقي كبيرة لما تيجي بعد وقت و تعب ، و معاها تقدير لربنا ،

و احساس بالناس الموجوعة زيك ..

ح يتأخر بس ح يجي و معاه في ايده كل اللي كنت فاكره راح و مش ح يرجع ..

مع اول خيوط النور ح يجي ماشي علي المية و يدخل مركبتك

و يوصلك للشط اللي تعبت الليل كله علشان تروح له ..