[walaa farouk]

كنت بقرا في تكوين ٢٩ ، إصحاح قصة الحب المشهوره
ليعقوب وراحيل
لكن لمحت قصة حب تاني ، حب مختلف
، حب اسمي وارقي من اي حب سمعت عنه ،
حب مابين اثنين ( الله وليئه )
ليئه المكروهه ...
ليئه الفقيره في كل مظاهر الجمال والقبول ،
ليئه اللي كل حاجه مضلمه في وشها ، ليئه الكبيره بس في السن ..
اللي اول يوم في فرحها ، بدل ما عريسها يحضنها
ويسرد قدامها وعود الحب الاحتواء
، صرخ في وشها مش انتي اللي بحبها ..
ليئه اللي واخده نفسها او اللي اتبقي منها
وبتجري بعيد عن صوت يعقوب
وهو بيزعق للابان ( انت ضحكت عليا وجوزتهالي )
مقدرتش تبصله لان حتي عينيها اللي اتملت دموع قال عنهم الكتاب ضَعِيفَتَانِ !!
ليئه كماله العدد ، اللي محدش بيتكلم معاها
، هيتكلموا معاها ليه ، لا جمال ولا خفه ظل ولا اي حاجه

لكن الله كان ليه نظره مختلفه
وَرَأَى الرَّبُّ أَنَّ لَيْئَةَ مَكْرُوهَةٌ فَفَتَحَ رَحِمَهَا، وَأَمَّا رَاحِيلُ فَكَانَتْ عَاقِرًا.
ليئه في نظره مثمره ، ليئه مقبوله ومحبوبه
، ليئه زمانها زمان الحب
حب مش من سبع سنين ، حب زمنه بيتعدي زمان عمرها
، ماهي في فكره من قبل ما تتولد

رساله لكل ليئه مكروهه ، انتي محبوبه مثمره ومقبوله بالكامل ،
انتي رائعته ، انتي كاملته ...

- فَمَرَرْتُ بِكِ وَرَأَيْتُكِ، وَإِذَا زَمَنُكِ زَمَنُ الْحُبِّ حز ١٦
- هَا أَنْتِ جَمِيلَةٌ يَالَيْئَةَ ، هَا أَنْتِ جَمِيلَةٌ. عَيْنَاكِ حَمَامَتَانِ. نش ١
- أَنَا سَوْدَاءُ وَجَمِيلَةٌ ... نش ١

ورائ الله ان ليئة مكروهه
، ففتح رحمها ليخرج من نسلها المسيح اسد يهوذا الغالب
، اخرج من المكروهه اعظم اعلان حب مقدم لكل العالمين ...