[Rena Jesus]

داري_علي_شمعتك
طبعا هتقولي ... "تقيد"
والمقصود من المثل انك تخبي علي الحاجات الحلوة اللي في حياتك عشان تفضل وتزيد وتستمر ...
عاوز اروح لحرفية المثل الأول ..
يعني ببساطة لو كل واحد عنده شمعه داري عليها ..
النتيجة الدنيا هتبقي ضلمة ..
هو نفسه مش هيستفاد من نورها ..

طيب هو ده مش حرااام
ربنا يكرمنا بشمعه وإحنا اللي نحرم نفسنا من نورها ...

طيب تطبيق المثل .. تخيل معايا كده حياة من غير خبر حلو ..
من غير قصة نجاح ..
من غير حد حقق حلمه ..
من غير حد ربنا شفاه ..
من غير حد ولاده نجحوا او مشروعه كسب او مشاكله اتحلت ...
النتيجة حياه بلا امل ... ضلمه!!

ياناااس ليه خوفنا يحرمنا من النور والأمل ..
ليه نحرم بعض من شوية تشجيع ..
ليه نخبي قصة نجاح تدي رجاء وثقة ..
مش يمكن شمعتك المنوره تنور شمعة غيرك اللي انطفت ..
تنور السكة لحد وقع وانكسر ..
توضح الحقيقية لحد تاه وبعد ..

مقدر خوفك علي شمعتك .. ومقدر خبراتك السلبية ..
ومقدر ان في ناس هدفها تطفي شمعتك ..
بس في المقابل النور اللي ممكن تعمله شمعتك هيعمل فرق في وفينا ..
حافظ علي شمعتك .. احميها .. بس بلاش تداري نورها ..
جرب تشارك بأمل ..
جرب تشارك بفكرة عملت معك فرق ..
جرب تشارك بنجاح او انتصار او مكسب ..
جرب عشان في ناس بتموت من كتر الضلمة