[walaa farouk]

عيد النيروز




سنه جديده للشهداء..
معرفش ليه عندى مشاعر مختلفه السنه دى غير كل سنه.
. يمكن احنا للاسف فى بعض الاوقات بنهتم براس السنه الميلاديه اكتر ويبقى عندنا فيها امنيات وبنعلن توبه
ونقفل فيها حسابات وضعفات جوانا وبنحاول نبتدى من جديد
لكن تقريبا دايما سنه الشهداء مش بتاخد مننا نفس الاهتمام الروحى لحياتنا . لكن انا السنه دى عندى مشاعر ليا
وليكوا كلكوا فى بدايه سنه الشهداء
ويمكن من نعمه ربنا علينا ان السنه دى جايه اجازه
فممكن تحضر الصلاه بليل فى الكنيسه او لو مش قادر تحضر القداس الصبح يعنى تقريبا مافيش عذر ولو مش هاتقدر تعمل ده
او ده تقدر تقف تصلى فى اوضتك
وتقعد تقرا فى الانجيل شويه لان تانى يوم انت اجازه
فتقدر تظبط الامر الروحى نشكرربنا
لكن حابب اقول لنفسى واقولكوا ليه عيد انيروز السنه دى مختلف
حاسس ان السنه دى ربنا بيصرخ لينا كلنا
(كونوا لى شهودا) كفايا انى اعيش اتمنى لنفسى
بس ربنا عاوزنا نشهد عنه.. واديكوا شايفين اواخر
السنه دى ربنا اختار ناس كتير للسما فجاءه واعلن بصرخه كبيره ان مافيش اى وقت للاستهتار وصرخ اكتر من وجه نظرى برحيل(الانبا ابيفانيوس) كان اعلان واضح للاستشهاد والشهاده ..
ربنا محتاج منى منكوا السنه دى فى عيد النيروز
اننا نكون الوقت اللى جى شهود بجد
يعنى نبداء نجاهد اكتر فى قطع اى علاقه تمنع عنى الشهاده الحيه للمسيح..
نبداء نجاهد اننا نعلن اسم المسيح فى شغلنا وبيوتنا وخدمتنا
نبداء ننسى اننا فى دنيا محتاجين منها حاجه لكن الدنيا تتحول لميدان حرب لازم اكون فيه جندى صالح
حاسس من جوايا ان سنه الشهداء السنه دى
لازم تكون مختلفه مش حكايه (بلح وجوافه)
ونعيد على بعض فى الرسايل بصور للنيروز..
لكن تبقى سنه تقف فيها قصاد ربنا وتقوله عاوز ابقى شاهد ليك حقيقى.. شاهد ليك بوجعى وألمى. شاهد ليك بمرضى.
. شاهد ليك حتى لو بموتى..
ابداء من سنه الشهداء دى اننا نحسب نفسنا اننا عايشين لحظات وبكره هاروح لبيتى ولوطنى
بس سؤال بيدور جوايا بيوجعنى جدا. طب وضعفى؟
والبلاوى اللى شايل حملها وخايف منها
ومخليا حياتى كئيبه ومش عارف افرح اعمل فيها ايه؟
اه نفسى اعيش عيشه الشهاده دى لكن ضعفاتى وخوفى
وقلقى بيمنعونى فبحس انى بستمر فى الضعف .اعمل ايه؟
كانوا بيقولولي زمان وانا عيان بص لازم تتحرك كده
وماتستسلمش لمرضك لما تقوم وتتحرك هاتلاقى نفسك واحده واحده بقيت احسن. ولما اقوم من على السرير وابداء اقعد واتكلم ويفتحوا الشباك علشان الشمس تخش بحس اني بتجدد ..
اه لسه عيان لكن بتجدد فى شئ جديد دخل
والفيروس ده والمرض بيخرج منى واحده واحده.
. تعالوا احنا نعمل كده كمان فى ضعفنا نقوم من الضعف. نفتح الانجيل يدخل منه نور المسيح نحس بالتجديد هاتلاقى نفسك عيان بس مع الحركه والتجديد هاتنسى تعبك وتعبك هايروح واحده واحده
نبتدى بس ومانخافش
تعالوا نخلى السنه دى انى اعافر انى اشهد عن المسيح والكنيسه.. اعافر واحارب انى ابقى شاهد يمكن فى يوم اكون شهيد
كل سنه وانتوا مستورين ومحميين فى دم المسيح ونعمته