[Rena Jesus]

المشاعر إشارات وليست أوامر ...

يعني المشاعر جايه برساله ... جايه تقولي في حاجه بتحصل ...
إشارات لوضع ممكن يكون مش ظاهر وواضح لأسباب كتيره
(منها إني فقدت التواصل مع نفسي).
أما بقي أتصرف ازاي وأعمل ايه ...ده موضوع تاني.

-حاله الضيق والخنقه الل بتجيلنا بدون سبب ... وراها رساله.
-إحساس الحزن اللي بيسيطر علينا من موقف او ذكري ...
-الغيظ المكتوم جوانا لما حد قدامنا يعمل حاجه مش علي مزاجنا ...
-الشعور بالخذلان من الناس اللي كنّا متوقعين منهم مواقف و وقفات في حياتنا ...
-الشعور المفاجىء بالرفض لوجود شخص معين حواليك ...
-الشعور بالراحه لوجود شخص معين او وجودك في مكان معين .....
-الغضب من شخص أو موقف بيحصل قدامك ....

كل دي إشارات إن في حاجه ...
محتاج تقعد معاها وتفك الشفره وتسأل نفسك ... في إيه؟
محتاج تعرف ايه اللي ورا الشعور ده ..
أما بقي تصرفك برد فعل معين ...
سواء كان عنيف او هروب بمسكك للموبيل وتقليب فيه بدون هدف او ترمي اللوم علي اَي حاجه أو الاستسلام للشعور و حبس نفسك فيه ... أو ... أو ....
ده عدم إستغلال للاشاره ...

اللي بيهمل الإشارات بيفقد البوصلة مع الوقت ويتوه ...
واللي بيتصرف بغشوميه بأوامر المشاعر بيفتقد التعلم والتزكية والتغيير و نتحول اننا نكون أعداء ليها ...

المشاعر نعمه كبيره ...
معجزه حقيقه ربنا خلقها فينا بتحافظ علي وجودنا في الحياه دي بمتغيراتها الكتيره...
نظام استشعار وقرايه للمحيط اللي حوالينا

وزي أي نعمه لو لم يتم إحسان التعامل معاها تتقلب علينا ...
ومن هنا بنشوف الخوف منها والشكوي منها والهروب وساعات بنتمنى متبقاش موجوده اصلا ...
وهي دليل بشريتنا ووجودنا في العالم ده ...