[Rena Jesus]

أنت تستاهل اللي بيحصلك.
أنت متستاهلش أصلا
أنت إنسان معقد....
تصدق حلال اللي بيتعمل فيك
روح شوفلك دكتور يعالجك

سمعت الكلام ده قبل كده؟!...... وكنت مستغرب ليه بيتقال لك
واللي وجعك اكتر اللي بيقوله.!!!
تعالي أقولك

أنسي كل الكلام ده... مهما يكون مين مصدره عارف ليه؟

لأن اللي يقول كده بيكون إنسان عقله منغلق،
قلبه منغلق والنوعيه دي من الناس بيحتاجوا حد يتغذوا علي مشاعره وهدمه علشان يحسوا انهم شئ يحسوا بأهميتهم.
بيكون إنسان جبان مستخبي وراك بس بيكسر فيك من ظهرك وكل ميحسوا بنقصهم كل مبيكون هجومهم عليك هجوم بشع بس في صوره جميله سم جوه العسل.
عاملين زي الطفيليات بتتغذي علي دم العائل اللي شيالها.

أنت مش محتاج تثبت نفسك للنوعيه دي من الناس،
مش محتاج تثبت إنك إنسان كويس ويستاهل ....
مش محتاج تعيش بتحاسب علي الكلمه خوف من رد فعلهم وكلامهم.
مش محتاج تكسب حبهم لانهم اصلا مبيعرفوش يحبوا.

أنت مش إنسان معقد ولا تستاهل اللي بيحصلك...
أنت انسان محاط بنوعيه غلط من الناس محتاج تشوفهم علي حقيقتهم
دول مش ناس بيتكلموا من قلبهم ومن خوفهم دول ناس بتتكلم من كرهم لنفسهم، من رؤيتهم واحساسهم أنك أفضل منهم فلازم تُهدم من جواك.
تُدمر بطريقه ناعمه بتتسرب جواك براحه وبنعومه في وسط ضحك،
في وسط جد ومرات في وسط مدح بس مدح هادم سم جوه عسل.

وإن كنت متستاهلش فأنت فعلا متستاهلش تكون مع ناس زي دي.