[walaa farouk]

سؤال مثير للجدل ..
تخيل لو روحت لدكتور الأسنان، وحقيقي كان دكتور شاطر وعالج اسنانك كويس...
وبعد ماخلص علاج ادالك نصايح ..
-لازم تغسل سنانك مرتين في اليوم
-يفضل لو تستعمل فرشة بالكهربا
-ولازم تغسل بين سنانك بالفرش الصغيرة اوي ...
بعد شوية وبالصدفة .. انت اكتشفت ان الدكتور الشاطر ده مش مواظب على غسيل سنانه كل يوم

، وبيكسل على الفرش الصغيرة، بل ممكن تكتشف ان سنانه مسوسة كمان...
السؤال هنا ...
بعد ما تعرف كل ده هتعمل ايه؟؟؟
قدامك حل من تلاتة..
- تقول انا لا يمكن اروح له تاني ده دكتور بيقول غير اللي بيعمله ،

انا اتصدمت في الدكاترة ..وتبطل تروح لدكاترة اسنان.
- الحل التاني انك تقول .. انا لا يمكن اروح للدكتور ده "

، لكن هدور لغاية ما ألاقي دكتور بيعمل اللي بينصحني بيه بالظبط ..

لأن هو ده الشئ الوحيد اللي هيخليني اعمل اللي الدكتور بيقوله غير كده يبقى نفاق،

وانا متعالجش عند منافق ابداً.. وتفضل تدور
- الحل الأخير ... اسمه وانا مالي .. لو نصيحته سليمة وانا اتبعتها يبقى انا المستفيد،

لو نصيحته زي "ما قال الكتاب" اشغل نفسي ليه بسنان غيري!

وفي الحل ده هتسمع الكلام وهتغسل سنانك وهتبقى فل الفل ...
انا دايماً بختار الحل الأخير ...
مش في السنان ... لكن مع كل معلم، معلم في المدرسة او في الجامعة او في الكنيسة...
انا كاتبة مخصوص علشان الكنيسة!
اتعلم اتعلم اتعلم
واشتغل واغسل ونضف .. تمام زي ما بيتقال ..
وسيب كل واحد لنفسه ... أصل يمكن دكتور السنان بيحاول يتغلب على كسله،

يمكن مترباش على كدة بس بيحاول يساعدك ... مالي انا لو هو منافق ...
يا عزيزي صدقني ... كلنا بشر!
والله أعلم.