- كنت بذاكر فى كافيه و شدنى جدا كلام بنت و هى بتعاتب خطيبها و بتقوله :
" انت انسان كويس جدا ، بس دايما سطحى معايا ، عمرك ما اهتميت بتفاصيلى الصغيرة ، عمرك ما خدت بالك من الحاجات اللى بحبها ، مسمعتش الاغنية اللى بعتهالك اخر مرة و كان رايك يفرق معايا جدا ، اخر مرة اتضايقنا كنت عشمانة انك تستنانى بعد معاد شغلى و كنت هتصالح بس انت قلت تسيب الموضوع يهدا و اتاخرت كتير ، عمرك ما شجعتنى على حاجة انا بحبها ، حتى الهدايا بتاعتك تقليدية و مفيهاش حاجة تشبهنى ، انت ممكن تكون شايفنى تافهة فى كلامى ، بس مش قادرة مقولوش !! "
- تامر عبده امين كان بيحكى عن مقال تحت عنوان " The day when we met " ،
بيحكى فيها عن بنت كانت بتحب ولد جدا و مخلصة ليه بكل الطرق و هو كان فرحان بوجودها عشان جمالها بس ، و كانت النهاية انهم سابوا بعض ،
و فى ضمن حفلة منظماها الجامعة طلبوا من كل طالب يطلع يحكى عن قصة اولها يكون " the day when we met " ،
كان تفكيرها فى الولد اللى سابته و ازاى هتحكى عن كل اثر وحش سابوا فيها .. واحد زميلها تانى فضل يقنعها متعملش كده بس رفضت ..
الولد ده شاف ان فاضل 15 يوم على الحفلة و انه لازم يخليها ترجع عن اللى فى دماغها ،
اهتم ان كل يوم خلال اسبوعين يعملها مفاجاة بسيطة كل يوم يبين فيها اهتمامه بتفاصيلها ، زى مرة دفع الفلوس للكارتة اللى بتعدى عليها كل يوم ، و مرة اتفق مع المطعم اللى بتقعد فيه انه يعمل طبق باسمها و يحطه فى ال menu و يقدمه من غير فلوس ليها ،
و هكذا لحد ما جه يوم الحفلة وجهت كلامها لصديقها التانى و قالت : " يوم ان قابلتك ، تغير كل شئ " ..
- من سنتين كنت بشتغل فى مكتب Decoration & interior design ،
و فى مرة بقول لمهندس معايا :
" على فكرة الموضوع طلع سهل و اى حد يعرف يشتغل الشغلانة دى " ،
عجبنى رده جدا لما قال : " اللى بيفرق بين شخص و التانى " التفاصيل " ، الحاجات الصغيرة اللى متخدش بالك منها ، بس لو سيبتها مرة فى التانية هتلاقى مشكلة كبيرة و يمكن صعب حلها .. "
- التفاصيل فعلا بتفرق ، التفاصيل ذى الملح فى الاكل ، حاجة بسيطة جدا ،
يمكن ميبنش وسط مكونات كتير ، بس من غيره ميطلعش الاكل مظبوط ،
التفاصيل تفرق بين واحد عارف كلمتين عن الموضوع من بره و واحد فاهم كويس ،
تفرق بين واحد بيحب بجد و واحد عايز يمشى الدنيا ..