[walaa farouk]

موبايلك لو فصل منك وانت فى البيت ونايم عادى هاتشحنه .

. لكن أغلس حاجة ممكن تحصل لو فصل منك وانت فى الشارع ومعاك مكالمة مهمة جداً ووراها خبر أهم

.. اللى هو ماينفعش يفصل دلوقتى منك ..

تبقى نفسك لو السما فى اليوم ده تمطر بطاريات مشحونة جاهزة .

الفترة الأخيرة جربت ياعنى إيه أبقى فاصل شحن

فى أكتر وقت ببقى عاوز أكون فيه فايق ورايق ومتاح ..

ياعنى إيه نفسى فى حاجة سهلة وبسيطة وموجودة عند كل الناس لكن مش لاقيها عندى ..

ياعنى إيه أتمنى أوقف الوقت وأتمنى لو أرجع يوم لورا أو سنة لورا ..

إحساس بالعجز فى عز ما لازم أعمل حاجة .

تبقى فاصل شحن فى مشاعرك وأفكارك ..

يبقى الوقت واخد بالك منه بالثانية وكأنه مابيعديش ..

وبتعد ضربات قلبك عشان الوقت الصعب ده يفوت وترجع زى ما كنت قبل كده .

ماكنتش زمان بفهم ياعنى إيه حد جايب آخره ..

الفترة اللى فاتت فهمت ان وقت الفصلان ده وقت مؤلم وصعب ولا يحتمل .

. وقت محتاج فيه لناس تسندك وتشجعك وتطبطب عليك بقلبها وتحس بالكلام اللى جواك وانت مش قادر تنطقه .

. ناس تطمن وتريح وتهدى .

. ناس تسامح غضبك وقلقك وتوترك وخوفك وهروبك وتديك كل الأعذار والمبررات ..

ناس تكون فيشة لروحك الضعيفة وعازل لنفسك المتكهربة .

يمكن مافيش حد مابيمرش بفترة الفصلان .. لكن المهم ساعتها يكون جنبه مجرد إنسان ♥