[walaa farouk]

شباب الثانويه العامه ماتخافوش

..خليك انت بس امين في وقتك وسيب الباقي ربنا يخططهولك
شويه نصايح كده علشان الايام دي تعدي
1)ماترجعش الامتحان بعد ماتخلص( اصلك مش هاتعرف تصلح حاجه لو فيه حاجه غلط فاهتتوتر علي الفاضي )
2)خلص امتحانك وروح علي بيتك علشان تستغل وقت كويس انك ترتاح
3)ماتبصسش علي اخبار الثانويه العامه علي النت لان ربنا بيعمل عكس التوقعات
نصايح كده للاهالي
1) بلاش تمسكوا ورق الامتحان لعيالكوا وتقوللهم عملتوا ايه في دي ودي ودي..

هو خارج متوتر لوحده..فبراحه كده

2)بلاش كل نص ساعه تخشوا علي عيالكوا وهي بتذاكر وتقولولهم (شوفت اختي بتقول ان بنتها منهاره من امتحان انهارده...شوفت بيقولوا ان الامتحان بتاع النهارده بسببوا في عشره انتحروا واتنين في حاله خطره.)خليكوا مصدر راحه كده واخبار مفرحه او الصمت في الاوقات دي افضل صدقوني
3)بلاش تقولوا لعيالكوا وهما نازلين الصبح او هما بيذاكروا تقولولهم (طبعا يا ابني احنا عملنا اللي علينا ومقصرناش معاك في حاجه) بلاش تحسسوهم انهم داخلين حاله ولاده..بلاش حتت دفعنالك دروس وجبنالك بناطيل ههههه الجو ده بيزل ويوتر صدقوني .
((( فربنا معاكوا يا شباب ومع الاهالي اللي تعبانه طول السنه وربنا يكلل تعبكوا بالنجاح‘‘‘ ماتخافوش))))