[walaa farouk]

يومنا مش بيخلى من التحديات...
وبرضو مش بيخلى من المعجزات...
وﻹننا امتزنا ببنوتنا وبنتمتع بإبوة الله (بابا)..
فا ده بيميز يومنا وبيميزنا احنا شخصياً جوة التحديات
التحدي مهما كانت صعوبته أو سهولته .. طول مدته أو قصرها
فا لو مدركة إن تصديقك الداخلي وإيمانك بقدراتك
هو أكبر عامل جوة أي تحدي .. فا إنتي هتفرقي كتير عن غيرك
اللي بيمروا بنفس تحدياتك
تاني حاجة محتاجة تصدقيها بكل كيانك وانتي في قلب التحدي
"إن التحدي ده جالك علشان تهزميه وتنتصري عليه"
كل حاجة بتصدقيها جواكي بتتجسد في تصرفاتك
مصدقة إنك قوية هتجسدي تصديقك في مواجهتك لتحدياتك بكل قوة
واجهي خوفك بإيمان إنه مش أكتر من "عدو مهزوم"
قومي من الخوف والقوقعة .. كفياكي تطبطبي على نفسك
وتشفقي عليها وكأنها ضعيفة ولا قدرة ليها ولا قوة
إنتي مش ضعيفة .. انتي بس مش مصدقة قدراتك
فيه غيرك بيمروا بنفس تحدياتك وعدوا منها وانتصروا فيها
وفيه بيمروا بأصعب وابتسامتهم مالية وشهم ﻷنهم صدقوا قدراتهم وانتصروا
غالبا الشفقة الزيادة على نفسنا وندب ظروفنا ورثاء ذواتنا
بيعمينا عن قدراتنا بالكامل
كفاية استضعاف لقدراتك وقدرة ابوكي فيكي.. كفاية رثاء لذاتك
انتي شجاعة جدا 💪 ومليانة قدرات عظيمة محتاجة تصدقيها وتشوفيها.
وعندك آب واله وصديق عظيم مش بيسيبك لحظة
ايدك في ايده وقومي انتصري وافرحي وابتسمي وانطلقي
حتى المواجهة معاه مش هتكون منهكة أبدا
انتي اول ما هتقومي وتصدقي في قدراتك وقدرة الله فيكي هتلاقى أمور كتير زي ايزابل اختفت لمجرد ادراكك
وطريق جديد شقشق نوره قدام عينيكي 💥💥
👸👑