[walaa farouk]

بستغرب اوى لما بسمع ان حد بيسأل على حد فا بيقولو : عامل ايه؟
فا التاني يقولو : اهو بلطش فى الدنيا و الدنيا بتلطش فيا!!

بعيدها عن الفلسفة و الفزلكة. بس يعنى ايه الكلام ده؟ الدنيا بتطلش فيك = انك تعبان من الحياة و صعابها و مشاكلها و لو ده التشبية الى بتستعمله فا اوك ينفع اوى تقول كدة
لكن مفهمتش انت بتلطش فى الحياة ازاى؟؟؟
ثم انت مين علشان تلطش فى الحياة اصلا؟
ثم الحياة دى شكلها ايه علشان انت تلطش فيها فا توجعها مثلا؟
خلونى اديكم مثال عن الناس الى بتلطش فى الحياة بس تلطيش قاتل
مثال 1 :
واحد فضل يضيع فرص المذاكرة و النجاح و اصر على انه يبقى فاشل حتى على الرغم من انه اتربى فى مكان و بيئة كويسة لكن قرر انه يمشى مع اصدقاء السوء . و من كتر ما الناس تعبت منه و من طريقتة فا هو بعد عن الناس و الناس بعدت عنه و لقى نفسة وحيد فا قرر انه بما انه وحيد فا براحته و قرر يشرب مخدرات و بعد شوية بقى يبيعها علشان يعرف يكسب فلوس تعيشة
هو قرر انه يلطش فى الحياة و يأذى نفسة بما ان الحياة مخليتهوش شخص محبوب بس هو مش عارف انه هو الى عمل كدة فى نفسة مش الحياة
مثال 2
بنت جميلة رائعة . اتقدملها عريس معقول مناسب لكنه مش ملهوش علاقة بربنا خالص. قررت بمشاعرها انها تتجوزه و بعد سنين من الجواز و بعد ما عرفت ربنا اكتشفت انها و جوزها مينفعوش مع بعض.
الزوج سيئ و هى اتحولت من كائن لطيف جميل رائع الى كائن صعب و قررت انها تطلق..لحد هنا كل ده قرارتها هى مش الدنيا الى قررت لها حاجة
هى قررت تطلق و تلطش الحياة بالقلم و تتجوز حد تاني !!
يالهوووي جواز تانى بغير كلام ربنا فا ده اسمة زنا بحسب كلام الانجيل
فين اللطشة الى ادتيها للحياة؟ انك تتجوزى راجل تعيشى معاه فى حياة الزنا ؟؟ جواز مدني؟؟ ياااااه لطشتى غلط وفى المكان الغلط
الخلاصة
فى كل مرة بتحاول انك تأدب الزمن و الحياة و الظروف انها مخليتكش تعيش الحياة الى انت كان نفسك تعيشها. فا تأكد ان الضربة هتترد فيك انت تانى للاسف
عندك فرصة تدى ربنا مكان و مساحة يصلح كل الاخطاء الى انت اخدتها غلط فى حياتك لكن انك تتصرف بعناد و تعتبر ان الحياة دى شخص وانت بتنتقم منه فا للاسف حياتك هتبوظ و هتغرس فى الوحل اكتر
ربنا يلحقنا
هاني