[walaa farouk]

فاكرين مدرس العربي الرخم؟؟.. أيوة هو، اللي كان ما بيرضاش يقول حصة بكرة هتكون ايه.

. فكنا نضطر ناخد معانا كل كراريس وكتب العربي، ونشيلها على ضهرنا كل يوم.. نحو وبلاغة ونصوص وقراءة واملاء..

كله على بعضه متكربس في الشنطة التقيلة اللي زي التهمة.. كل يوم ماشيين بيها محتاسين، وضهرنا محني.. ومش قادرين نقف على حيلنا بسببها.
ع العموم أهي أيام وراحت.. لكن للأسف، أوقات كتير بنلاقينا حاسين نفس احساس الشيلة التقيلة اللي فوق ضهرنا.. وكتير بنحس بنفس الحوسة واللخبطة بتاعة زمان..

بس مش عشان شنطة المدرسة وكراريس العربي كتيرة.. لأ، دا عشان مشاعرنا هي اللي كتيرة وداخلة في بعضها زي بكرة خيط ملعبكة.

. مشاعر كتير جوانا ممكن تطلع من غير ما نحس بيها.. والكارثة انها بتتحكم في سلوكنا وتصرفاتنا برضو من غير ما نحس.

. فتكون النتيجة ان المشاعر دي هي اللي بتقودنا.. وياما مشينا في طرق ماكناش نتوقع اننا نمشي فيها..

وياما اتورطنا في اختيارات ماكانش المفروض نختارها.. كل دا بسبب المشاعر.. ويادي يادي المشاعر!
ياترى ممكن حد يسوق عربية من غير ما يتعلم السواقة؟.. ومن غير كمان ما يبقى شايف العربية اللي بيسوقها؟!
طبعا لأ.. تمام زي مشاعرنا.. عشان نقدر نديرها محتاجين نفهم يعني ايه ادارة مشاعر.. وعشان نفهم ادارة المشاعر محتاجين نفهم يعني ايه مشاعر اصلا.

. وقبل كل دا نحاول نفهم نفسنا عشان نقدر نشوف مشاعرنا صح.. نحاول نعرف احنا مين.. وإيه صورتنا الحقيقية عن نفسنا..

ايه اللي قادرين نقبله فينا، وإيه اللي مش شايفينه.. ايه اللي رافضينه جوانا وبنحاول نقبله بشجاعة، عشان نقدر نغيره.. وبالطريقة دي نقدر نميز بين مشاعرنا المختلفة..

نقدر نشوف الفرق بين الحزن والغضب.. بين القلق والخوف.. بين الرغبة والاحتياج.. بين الغيرة والشك.. بين التواضع والنقص.. وغيرها كتير من مشاعر بتلخبطنا وتخلينا معزولين عن نفسنا

، ومش فاهمين تصرفاتنا.. ياما كتير بنندم على حاجات عملناها بسبب احساس ما، كان هو اللي بيدفعنا نعمل كدة.. بس ما بنكونش فاهمينه وقتها، ولا قادرين نحدده.
بس الكارثة الأكبر من كل دا، لما نكون قادرين نحس بمشاعرنا الحقيقية.. لكن ننكرها!.. ننكرها عشان خايفين نتوجع منها.. إنما الانكار دايما نَفَسه قصير..

وحتى لو استمرينا في انكار مشاعرنا (ونقول احنا فلة شمعة منورة)، بييجي دا على حساب حاجات تانية.. مثلا علاقات مهمة في حياتنا ممكن نخسرها..

أو ممكن ندخل في علاقة تسبب لنا ضرر وترجعنا لورا.. م الآخر كدة بحر المشاعر كبير، وبحر انكارها أكبر.. لكن الأكبر من دا و دا: وعينا بذاتنا.
بس طبعا الحكاية مش سهلة، ومحتاجة لمتابعة وتدريب.. خصوصا في المواقف اللي بنلاقينا هنتصرف فيها بطريقة مش راضيين عنها.

. محتاجين ساعتها نهدا، ونسأل نفسنا كام سؤال:

- حاسين بإيه في اللحظة دي؟ ( مدى وعيي بذاتي).
- من إمتى بالظبط حسينا بالاحساس دا؟ (تفاصيل الموقف).
- شوفنا نفسنا ازاي لما الموقف دا حصل؟ (صورتي عن نفسي).
كل ما نتواصل مع نفسنا أكتر وأعمق، كل ما هنجاوب ع الأسئلة أسرع وأسهل.. وساعتها هنقدر ع الشيلة مهما كانت تقيلة، من غير ما تِحني ضهرنا.