[walaa farouk]

🔛 آية كنت بعدي عليها مرور الكرام كل ما بقرأ سفر ميخا ..

"فِي ذلِكَ الْيَوْمِ، يَقُولُ الرَّبُّ، أَجْمَعُ *الظَّالِعَةَ،* وَأَضُمُّ *الْمَطْرُودَةَ،* وَالَّتِي أَضْرَرْتُ بِهَا *وَأَجْعَلُ الظَّالِعَة*َ بَقِيَّةً، *وَالْمُقْصَاةَ أُمَّةً قَوِيَّةً،* وَيَمْلِكُ الرَّبُّ عَلَيْهِمْ فِي جَبَلِ صِهْيَوْنَ مِنَ الآنَ إِلَى الأَبَدِ.
(مي٤: ٦-٧)
⬅ *الظالعة* ≈ (العرجة ؛ المعيوبة)
⬅ *المقصاة* ≈ ( المُستَبعدة ؛ المرفوضة)

لما كنت بقراها كنت بفهمها ان ربنا طيب وحنين وبيسند الضعيف ... كنت بفهمها كده من غير ما احس بقوة معناها

لغاية ما روحت ابيع عصافير 🐧🐦 لبتاع العصافير ..

كنت رايحة معايا حوالي ٤ عصافير ... لقيت الراجل خد تلاتة ؛ وادني سعر فيهم معقول وجه عند الرابعة وقال:
- *لاااااااا ؛ مش هاخدها…!!!*
قلت له :
- ليه ؟؟؟!!! ⁉

قال :
- انا لو اخدتها محدش هيشتريها مني خالص لان عندها *عيب خلقى في ظهرها* ... علي فكرة كان العيب ده مش ملحوظ خالص .. انا كنت اول مرة اخد بالي منه ...

قاللي :
- لو عايزة تبعيها انا هخدها ب ١٠جنيه ... طبعاً ده مايحصلش ربع تمن العصفور ...!!!

هنا رنت في وداني الاية دي "اجمع الظالعة (العرجة والمعيوبة) واضم المطرودة" ؛ رحت اخدت العصفورة من الراجل وقلت له :
- *خلاص مش عايزة ابيعها وانا اللي هربيها …!!!*

رجعت بالعصفورة البيت وانا ببص لها طول السكة ومتأثرة جدًا ..

كنت بقولها انت *ملكيش ذنب تتخلقي كده* ويكون فيكي الضعف ده ... *ملكيش ذنب* الناس يعاملوكي انك رخيصة وبلا تمن ... *ملكيش ذنب* انك تعيشي منبوذة من الكل والناس تشوفك انك ولا حاجة ... ‼

حطيت العصفورة في قفصها وسمتها وقتها *(الظالعة)* ؛ وقلت بقى انا هاخدها تحدي واديني اهو نفذت اول الاية (اني ضميتك للعصافير اللي عندي) ؛ وهاشوف بقى هل هيتنفذ فعلاً كمالة الوعد .... *"اجعل للظالعة بقية (نسل) والمقصاة (المستبعدة والمرفوضة من الناس) أمة قوية"*

🙏 كبرت العصفورة قدامي وزوجتها لعصفور وفعلاً لقيتها كل شوية تبيض وتطلع عصافير جمال جداً جداً جداً

طبعاً فرحت بيهم جداً جداً جداً ... وقلت :
- *يااااااااااااه يارب ؛ فعلاً نظرة الانسان غير نظرتك ... انت بتشوفنا اننا حلويين وجمال بالرغم من ضعفنا .. والناس بتشوف الضعف بس وتقعد تركز فيه…!!!*

مفيش مشكلة يارب اكون *ظالعة* قدام الناس ... علشان تتحنن انت علي وتضمني لحضنك ولرعايتك ... *ويظهر جمالي من خلالك* ...
ومعنديش برضه مشكلة اني اكون *مقصاة* من الجميع ؛ ولكني مقبولة فيك ومنك... *فتفوح مني رائحتك الزكية* …

🙏 *أشكرك … أشكرك … أشكرك*