[walaa farouk]

كان فيه راجل جاله نقل في شغله لمكان بعيد
حاول يجيب وسايط الدنيا كلها
لكن للاسف معرفوش يعملوا اي حاجه
نفسيته تعبت لان كان عاتل هم عدم الاستقرار والمرمطه اللي كان هايشوفها مابين السفر والغربة بالايام عن اسرته
مراته قالتله رجلينا على رجلك .. مش هاتسافر لوحدك
قالها ومدارس العيال
قالتله هانقدملهم هناك
قالها بس المستوى اقل بكتير
قالتله هذاكرلهم واتابعهم
وبالفعل بدأ يشوف مشتري للشقه
وماشي في القرارات اللي خدها
لحد ما في يوم واحد دفع عربون
صاحبنا تاني يوم راح الشغل علشان يمضي اخلاء طرف من المكان اللي فيه استعداد للنقل
لكنه اتفاجئ ان النقل اتلغى .. والسبب " اوامر عليا "

جري على البيت علشان يفرحهم
ورجع العربون للمشتري
وبدأ يمسك التليفون ويشكر كل الناس اللي كلمهم
لقى البيت كله مبسوط .. لكنه ملقاش بنته الصغيره جنبه
اتسحب على اوضيتها
لقاها بتصلي وبتقول لربنا
شكرا يارب انك وعدتني ووفيت ❤

ساعتها اتكسف جدا من نفسه وعرف مين صاحب الاوامر العليا .. ومين الواسطه بتاعته الحقيقيه اللي تستاهل الشكر
ساعتها عرف قيمه الايمان بربنا والثقه الكامله المطلقه فيه
ساعتها عرف ان الله يسمع ويرى ويستجيب ❤❤
ساعتها عرف ان مجرد التفكير في حل بشري تاني قبل الصلاة لربنا يعتبر عدم ايمان بيه
ساعتها عرف ان الصلاة بإيمان قادرة تخلي الله يستجيب
او على الاقل يرسم طريق بإيديه علشان يخليك تمشي عليه
وساعتها بيكون ضمانه .. انه من الله ☝️❤