[walaa farouk]

لو لقيت لوحة مكتوب عليها خطر هتهرب ولا هتجرب تدخل؟!


الأماكن الخطيرة دايماُ بيكون مكتوب عليها تحذير لحماية أي حد يقرب منها، لكن أوقات ناس مش بتهتم بالتحذير ده وبتعرض حياتها للخطر علشان عايزين يجربوا، بس في الأغلب الناس دي بتندم بعد كده، ولو رجع بيهم الزمن مش هيعملوا كده تاني وهيهربوا من الخطر.


المرة الوحيدة اللي بولس قال فيها لتيموثاوس اهرب، مكانش مثلاً علشان ظروفه صعبة في البلد أو فيها اضطهاد لأجل المسيح، أو اهرب من الضيق والألم، لكن قاله اهرب من الشهوات الشبابية، مع أنه في أغلب الوصايا كان بيقوله تجنب كذا وحاول تعمل كذا وماتستسلمش واسمع الوصية وجاهد لكن المرة دي قاله اهرب وكأنه بيقوله دي مفيهاش هزار، دي منطقة خطر لو دخلت فيها هتخرج بصعوبة متحاولش تجرب أو تنجرف ليها، اجري منها واهرب لحياتك، علشان تضمن حياة صح، أهرب من شهواتك.

تيموثاوس كان شاب زينا، يعني الوصية مش مستحيلة للشباب، لو كانت مستحيلة مكانش بولس هيبعتهاله أصلاً، بس لأنه عارف أنه لو ركز هيقدر وصاه يعمل كده ولأنه عارف خطورة الموضوع كويس أوي قرر يقوله اهرب ومتتهاونش.

الرسالة ليك:-

لو بتنجرف ناحية أي شهوة من منطلق التجربة والفضول، صدقني هتغرق، علشان كده اهرب لحياتك- اهرب لحياتك دي كلمة كبيرة أوي، حياتك كلها هتتبهدل لو فضلت مكمل فيها، أنا شاب في سنك وكتير أوي الناس بتتريق عليا لأني مجربتش السجاير ولا دخلت في سكة المخدرات والحاجات دي لأني عارف نفسي كويس وبيقولولي فايتك كتير ولازم تجرب بس لأني عارف أن الموضوع مش مجرد تجربة وهتخلص، فالأفضل عندي أن الناس تكمل تريقة من إني أنزل في حفرة معرفش أخرج منها، علشان كده أنا دايمًا بهرب.