[walaa farouk]

مفيش حد بيختار وجوده في دنيتنا دي. اه صحيح إنت ممكن تكون إتوجدت نتيجة تخطيط من والديك وممكن تكون جيت صدفة وأحياناً كتير بتكون غلطة ونتيجة غير مرغوب فيها. لكن ختام الأمر كله إن تواجدك الجسدي إنت مش مختاره نهائياً. وكمان ممكن كتير مننا يكون ناقم ومش حابب الحياة ويوم ميلاده بيكون من الأيام الكئيبة في حياته لإنه بيفكره بوجوده اللي هو مش حابه أصلاً. بس هل عمرك فكرت إن نفخة الروح اللي فيك دي مفيش مخلوق مسئول عنها؟ هل عمرك فكرت إنه طالما روحك دي مش صناعة بشرية، فأكيد فيه سبب لوجودك؟ ملايين من البشر اتولدت واتوجدت ورحلت وهي في مرحلة الإنكار والنقمة على الحياة. على العيشة واللي عايشينها. بس ناس تانية يمكن مش كتير (للأسف)، جالها يوم، سواء على بدري أو متأخر وقفت وقفة مع نفسها وسألت "ياترى إيه معنى الوجود؟". ولإنها خرجت برة ظروفها ونقمتها وشعورها بوحدتها وراحت للي نفخ فيها نفخة الحياة دي بأسئلتها، تم مجاوبتها. قال لها كلام يدوِّب القلب. قال "قبلما صورتك في البطن عرفتك" (إرميا ٥:١). قال "دعوتك بإسمك. أنت لي" (إشعياء ١:٤٣). فتقوم تكتشف إنك موجود بمشيئة تفوق بكتير مشيئة بشر. موجود بحب كبير مايكوِّنهوش بني آدم مهما قِدِر. وياسلام على النور اللي بيدخل حياتك ساعتها وإنت بتفتح شباك المعلومة دي على ضلمة حياتك. وأول ما تفتحه تستقبل من خلاله نفحات هواء منعشة من القبول والحب وإحساس القيمة، فتقوم بإبتسامة وفرحة تترمي في حضنه وتقبل وكالته ودعوته ليك للوجود والإثمار والخلود. وياسلام لو أخدت الخطوة دي بدري بدري. قبل ما تضيَّع أيامك وسنينك في برية إسمها "ياريتني مااتولدت" أو "اللامعنى للوجود". وياسلام لو من بدري بدري اتكعبلت في الآية اللي بتقول “لِأَنَّنَا نَحْنُ عَمَلُهُ، مَخْلُوقِينَ فِي ٱلْمَسِيحِ يَسُوعَ لِأَعْمَالٍ صَالِحَةٍ، قَدْ سَبَقَ ٱللهُ فَأَعَدَّهَا لِكَيْ نَسْلُكَ فِيهَا.” (أفسس ١٠:٢). فتلاقي نفسك ماشي مقضيها تسبيح وتهليل وإنجاز في الملكوت، مهما كان حملك تقيل. وتلاقي نفسك صاحي كل يوم تقول:
ياسبب وجودي .. ليك سجودي ..