[walaa farouk]

لما قالولي دا ولد اتشد ضهري واتسند، لما قالولي دي بنيّة !!


لما قالولي دا ولد اتشد ضهري واتسند، لما قالولي دي بنيّة …..! هو الولد بس اللي بيسند أهله ؟

كلمات سمعناها زمان، لكن هل فعلًا ده رأي الناس حاليًا؟ ده كان رأي بعض الناس اللي سألناهم على المثل ده:-

س:- في ناس بتفكر كده لأن الولد بيحمل أسم أبوه، وبيكون راجل البيت من بعده، لكن مع الوقت اكتشتف ان البنت بتعمل كده وأكتر كمان وبتشيل أبوها وأمها لما بيكبروا مش بس بتشيل اسمهم

أ:- لما قالولي جبتي بنيّة قلت أخيراً مش هدور بره على الحنية

ي:- يمكن لو قلت ماتصدقونيش، بنتي لما جت ملت البيت فرحة، بقى فيه حياة، وونس انا كنت لوحدي، البنات سند

ومن ساعة ما شوفت أراء الناس دي وقلت قد إيه كل واحد بيحس بقيمة الحاجة اللي عنده لما بيكون محتاجها ويلاقيها جت فعلاً ولما رجعت للأصل اللي الله خلق علشانه الست، لقيته بيقول لآدم أنه أنا خلقت لك واحدة من ضلعك، أنت اللي كنت بتدور على ونس حقيقي أنا جيبتلك حوا، علشان تكون معينة نظيرة وكمان قال “غَيْرَ أَنَّ ٱلرَّجُلَ لَيْسَ مِنْ دُونِ ٱلْمَرْأَةِ، وَلَا ٱلْمَرْأَةُ مِنْ دُونِ ٱلرَّجُلِ فِي ٱلرَّبِّ.”(كُورِنْثُوسَ ٱلأُولَى ١١:١١) .

وأنا لما جاتلي بنت قررت أتحدى طريقة التفكير اللي بتقول يا مخلفة البنات يا شايلة الهم للممات وقررت أربيها صح وأقوي ثقتها في نفسها وأخليها قد المسئولية جدعة وقوية، قررت أغير الصورة اللي المجتمع رسمها عنها إنها متقدرش تنجح ومتقدرش تكون سَنَد، وفعلاً شُفتها قدامي بتنجح وبتكبر وكل يوم بفتخر إني مخلف بنت، بقت هي السند والضهر ليّ لما كبرت، بقت هي اللي بتشيل همي، ولقيت أن المثل اللي بيقول لما قالوا دي بنيّة اتهدت الحيطة عليّ دا مش حقيقي، الحيطة ما اتهدتش ولا حاجة لأني لما أنا كنت سند لبنتي حقيقي وشافت أني فرحان وفخور بيها، بقت هي كمان سَنَد ليّ، شجعوا أولادكم وربوهم صح، ابنوا ثقتهم في نفسهم علشان هي دي اللي بتفضل.