[walaa farouk]

ياترى بتفكر فى ايه ..
طفولتك اللى راحت ..
ولا الوجع اللى مش ملاحق عليه ..

مستنى تخرج وتلعب ..
ولا خيبة الامل ملازماك ..
اصلك كل ماتخرج تتعب ..

طب عرفنى ازاى بيعدى عليك الليل ..
بتضحك وانت بتتفرج ع الكرتون ..
ولا المسكنات بتنيمك نوم طويل ..

طب لما بتبص فى المرايا بتشوف ايه ..
بتشوف نفسك جميل زى مانا شايفك ..
ولا بتزعل م الحال اللى بقيت عليه ..

ماتستغربش انى شايفك اجمل حتى مننا ..
اصلك وانت فى عز تقل مرضك ..
بتبقى فى المنطقة المقدسة .. بين ايدين ربنا ..

عمال يغسلك وينقيك ..
بيحسسك بوجوده معاك ..
دانت يمكن ناقص تشوفه بعينيك ..

عارف وقفتك لوحدك .. وانت مش قادر ترفع راسك ..
على اد ما وجعتنى .. على اد ما غيرت منك ..
عشان اكيد فى اللحظة دى .. اللى خلقك حسسك انه باسك ..

اقولك ع اللى واجعنى كمان ..
ان فى عز مانا بازعل على التفاهات ..
شايفك فى عز ضعفك عامل لنفسك كيان ..

وكأنك رسالة ليا عشان افوق ..
لأن فى اللحظة اللى انت باصص فيها لتحت ..
انت كل فكرك واحساسك لفوق ..

انا مش عارف انت ازاى كدة كسفتنى ..
ولا اقولك .. كسفتنى دى قليلة عليك ..
انت م الاخر .. كشفتنى ..

وكأنك مسكت بإيدك الحرفين ..
وعلى كل خَدّ .. ضربت الم ..
مرة بالسين .. ومرة بالشين ..

مش عارف هتفهمنى لو قلت لك يا بختك ..
ولا اقول لنفسى ..
يابختى انا انى شوفتك ..

نفسى اقولك ..
ربنا يشفيك ..
بس اللى طالع منى ..
ربنا يعمل الخير ليك ..

وزى ماكنت رسالة ليا فى يومى ..
يارب رسالتك تروح لكل نفس واقعة ..
وتقول لها كفاياكى بقى .. قومى ..