[Rena Jesus]

اوعي تتخيل انك الوحيد الفريسة للأصوات ديه ،،
إنما كلنا بلا أستثناء فيه جحيم اصوات في دماغنا !
أنا و انتا و انتي و اي حد حي ع سطح الكوكب ده ضحايا للدوشة اللانهائية اللي جوانا ..
مش مرة في اليوم و لا مرة في الساعة ده 60 مرة في الدقيقة و يمكن أكتر !!..
بس طبعا عشان احنا ناس سليمة و طبيعية بنقول عليها ألفاظ راقية و شيك
زي صوت ضميرنا ، تفكيرنا الداخلي ، حوار مع ذاتنا ،
المهم نحافظ علي صورتنا المقبولة قدام نفسنا قبل اي حد ...

و الحقيقة أن الشعيرة اللي بتفصل بين الشخص الصحي و مريض الـ Schizophrenia (الفصام)
عمرها ما كانت بحجم الضجة اللي جواه أو مقدار الدوشة قد تعامل الفرد معاها ..
ففي كل مرة تتجبر تدخل الصراع ده بيكون زي إختبار حقيقي علي مدي استمرارية تحكمك في زمام الامور ..
فبالرغم من العجيج و الزوابع العقلية دية ، انتا لسه قادر توزان بين الحقيقة و الخيال ، بين الواقع و الوهم ، بين المنطقي و الجنون ! ..

لكن مع كل مرة الخبط يبقي اعنف و الانفجار بيبقي أشد ..
بتبقي عامل زي الفار المسكين بتدور علي اي جحر اسود مصنوع من عدم و صمت عشان تهرب من شر الأصوات ديه ..
و لما بتنجح بتخرج من مخدعك زي المنتصر عشان تحيي جمهور شخصك بمظهر العقلاني المتزن !

بس لما فجاة تلاقي نفسك حاولت و فشلت ، جريت بكل ما تقدر من قوة و رعب لكن برضة ملقتش الملجأ اللي يحميك !
ساعتها بتبقي وجبة شهية لسكاكين النداءات الوهيمة و التحذريات المتناقضة ..
و كانك غرقان في صندوق من الكلمات السايلة محاطة بيك من كل مكان ..
صندوق من فولاذ حجمة اصغر من كفك مقفول عليك بأحكام ..
بتصرخ باعلي صوت و انتا قافل بوءك .. بتبكي مرار الدموع و انتا فاتح عينك ..
بتضرب بروحك و ترفس بوعيك و انتا زي المشلول مش قادر تخرج برا نطاق أوضتك ..
برا نطاق الصندوق ..


cpd