[walaa farouk]

على فكرة أنا شايفاكي. مش شايفاكي بس، لكن كمان حاسه بيكى.
شايفاكى وانتى بتحاولى بكل الطرق تثبتى ان ليكى قيمه فى عالم مبيقدرش!
احساس بالفراغ والمراره والاحباط والغضب ..
.
شايفاكى وانتى بتبالغى في مظهرك لعل حد ياخد باله
شايفاكى وانتى بتتنحرى في شغلك وامومتك ومسؤلياتك لعل يحسوا انك كفاءه
شايفاكى وانتى بتتصعبنى على حالك ليل نهار لعل يشوفوكى عن طريق نواحك
شايفاكى وانتى بتهزرى في وقت مناسب ومش مناسب لعل ضحكهم على كلامك يوريهم قد ايه انتى ظريفه
.
انا عارفه اوى اوى الوجع والجوع اللى انتى فيه علشان انا مريت و بمر بيه وياما عملت عمايل وشقلبظات وحركات من اللى فوق دى عشان اسكت الوجع والجوع ده!
.
فى اوقات بتمر عليا بيبقى نفسى بس فى ناس معينه يقدروا قيمتى ..يشوفونى من جوه ويحبونى!! وتبتدى نفسى تصعب عليا، بس اكتشفت انه حتى لو شافونى و حبونى ..انا برضه مبشبعش ! لانى من الاصل مبصدقهمش! او دايما بحس انى عاوزه اكتر ومعرفش لحد فين!
.
بس اكتشفت برضه حاجه تانى ،انه عمر ما كلامهم فرق وشجعنى الا لما ابتديت انا بينى وبين نفسى الاول اصدق اللى الله قايله عنى ..لما دوقت الحب اللى هو بيحبهولى بجد مش كلام و شوفت نفسى في عينيه وذهنى استنار برؤية جديده لنفسى ولحب الله. عرفت بعدها اني اقدر قيمتى. وان مش حد او حاجه تانى هي اللي تخلينى ااقدرها.
.
مش بحتاج ساعتها اثبت لحد ان انا خطيره و فظيعه..لانى عارفه بينى وبين نفسى انى مخلوقه مليانه جمال ..لمسات الفنان اللى خلقنى ..ببقى بس مركزه على انى اعمل الحاجات اللى انا فعلا عاوزه اعملها ..
.
اوقات بحتاج ان حد يشاورلى فاتشجع،
لكن لما بلاقينى على طول محتاجه حد يشاورلى و مبعرفش اشوف مواطن جمالى وقوتى لوحدى ،والاحباط والمراره ابتدوا يملونى ،بفهم ساعتها انى مش متظبطه وبرجع انا و نفسى للى خلقنى واعيد على ذهنى انا مين و هو بقى في الحاله دى بيعرف يظبطنى ومش اى تظبيط ..حاجه كده بحرفنه ..وعن اختبار
.
خلاصة الرط ده كله..
انتى حلوه لأنك صنعة ايدين الله الخالق
مش لجمال ولا شطاره ولا خفه دم وان كانوا حلوين
انتى جميله و مميزه و متأكده انك مليانه عجايب هتكتشفيها وتنبهرى بيها لما تبطلى تبصى بره و تبصى مع اللى خلقك جواكى ... وتحدى!