[walaa farouk]

يارب انا عارف ان كتير قبلى عاتبوك على إختفائك فى اكتر الاوقات فى حياتهم صعوبة .. مكانوش لاقيين منك أى رد .. وكأنك اب تركت اولادك يتامى .. لدرجة إنهم سموك " الإله المحتجب " .. فى عز الشدة والألم والوجع والضعف عدم الإحساس بوجودك بيزود عليهم مشاعر عدم الأمان والخوف والوحدة القاتلة .. وديه مشاعر بتخلى روح الانسان وكأنها متأكلة وناقصها حاجات كتير عشان تهدى من ربكتها وحيرتها وعجزها وصراعتها .. إحساس صعب جدا لما أحس إنى ماليش ضهر
لكن أنا عارف وواثق إنك مش مختفى ولا محتجب لكن موجود جدا وحاضر فى كل لحظاتى .. عشان كده عتابى معاك مختلف .. إزاى تبقى موجود وشايف لكن تبقى واقف مش مفهوم .. مش فاهمك بتعمل ليه كده وفى اوقات تانية ليه مابتعملش لما ببقى محتاجك ع الاخر .. مش فاهمك ليه بتجيبنى هنا ومالحقش اتعود على الوضع فاتقرر تحركنى هناك .. بيبقى فيه جوايا طاحونة من الأسئلة وعلامات التعجب وأنت تفضل سر ولغز .
يارب أنا مش معترض على إرادتك .. أنا بس نفسى افهم إرادتك ديه رايحة بيا لفين .. افهم ليه بتعقدها هنا وتفشكلها برضو هناك .. توافق على وضعى وانا متضرر هنا وترفض وانا حابب ومرتاح هناك .. تحتاجنى اتحرك بسرعة وانا مكسور وتتجاهلنى لما أكون قادر اجرى .. تحرمنى من الناس اللى بحبهم وبيحبونى وترزقنى بناس مش حابة ليا الخير .. تبعتلى رسايل كل فترة وفى أكتر الاوقات اللى بحتاج اسمع فيها صوتك بتقطع جوابات وصدى صوتى هو اللى يفضل يرن لوحده فى المكان !
جملة كله للخير مابقتش تريح .. محتاج افهم ياعنى إيه خيرك ؟
جملة ما أبعد أحكامك عن الفحص وطرقك عن الاستقصاء مابقتش بترضينى .. محتاج تفسيرات لأحكامك واشوف بعينى الطريق
وماتعتبرهاش شك فى حكمتك أو قدرتك .. لكن إعتبرها إحتياج لأبوتك .. إبنك دلوقتى كبر عن زمان .
فلو أنا فعلا إبنك ماتسبنيش تايه فى أسئلتى وحيرتى .. لو أنا فعلا إبنك أرجوك جاوبنى وفهمنى