[Rena Jesus]

خمس انواع للحبيبة ! انت مع مين فيهم ؟!

١- النوع الموظف :
و ده الشخص اللي بيحب عشان مطلوب منه انه يحب او بمعني تاني مدفوع علي المشاعر ديه لسبب ممكن يبقي مجتمعي او عائلي ،،
و بتكون ممارسته للحب زي اي سلوك روتيني بيعمله في يومه ،
متبرمج علي كام حركة و كام كلمة و كام مكان بيروحه ، نمطي جدا و متوقَع جدا ..
فعلا زي موظف حكومي في مواعيد عمله الرسمية بيروح يعمل اي منظر و خلاص ،
يقعد المكتب و قدامه كومة دفاتر ، يعمل كأنه بيخلص اوراق و مستندات ،
ممكن يتعصب و ينفعل من ضغط الشغل !!
و كل ده عشان بس اللي حواليه يصدقوه انه بيشتغل مع ان الموضوع من اوله لاخره مبني علي الادعاء و التمثيل ..

٢- النوع المتشرد :
و ده الشخص اللي بيتعامل مع الحب بسلوك عشوائي طائش ،
هو بيحب بجد بس مش علي قدر كبير من الوعي و النضج في الحب ده ،
بيعمل اللي هو عاوزه في اي وقت من غير ما يركز في رغبة الطرف التاني او الظروف المحيطة ،،
و ده اللي يخلي دايما اللي معاه مش حاسس بامان او حرص و ممكن توصله مشاعر استهتار أو طفولة مراهقة ،
فممكن يتحط في مواقف مش محسوبه نتيجة حبه المتهور الغير متزن ده و للاسف بتكون باسم الحب !

٣- النوع المعقد :
و ده عنده مشاكل نفسية أو عقائدية و ما بيصدق يطلعها في الشخص اللي بيحبه ده ،
امه مش عارف كانت بتعمل ايه زمان في ابوه فيبقي انعكاسها ظاهر في علاقة الحب ،
جاره كان بيقول للست اللي ساكنه قصادهم ايه فهو شايف حبيبته دايما الست اللي قصادهم ..
من الاخر ده كائن عايش في عالم تاني من المؤمرات او الادراكات المغلوطة مش قادر يتحررر منها و للاسف حاسس بوحدة فعاوز اي حد يجره ،
فبيكون الشخص اللي بيحبه اللي يغصبه يعيش معاه الخزعلبات ديه ..

٤- النوع الفنان :
كان في جملة بتقول ( حبي مبدع عشان حتي لو موتي حيعرف يخلدك في اعماله ) ،
مفيش اجمل من الحب اللي مع فنان او فنانة ..
بيبقي الكائن الفنان ده شخص مبدع في ذات نفسه ،
دايما عاوز الغير مألوف و بيفكر في الجديد و في نفس الوقت عارف ان العمل الفني لازم يبقي له قوام صادق عشان يكون ذكي و يوصل للناس ،
برضة في حبه بيتعامل معاه زي ما بيرسم لوحة او يعزف مقطوعة و بيكتب شعر ،،
بيكرس كل امكانياته عشان يوصل لاقصي دراجات الابداع و النجاح ..
بس مشكلته ان ممكن ابداعه يكون مالي قلبه فيكون عايش في ذعر انه يخون ابداعه ده مع حد تاني و يبقي زي ما كافكا قال لميلينا :
( أخشي أن أخونك مع كتاباتي .. ! )

٥- النوع الافلاطوني :
‏(( أتساءل ما هو لون المشاعر؟ )) ..فرناندو بيسوا
النوع ده مش بيحب الشخص قد ما بيحب فكرة الحب في ذاتها ،
كائن عايش في ملكوت تاني من الافكار الفلسفية و وجودية عن المشاعر و الحب ..
و بالرغم من انه يبقي مرهق علي الطرف التاني انه يتعامل مع واحد اي خطوة او كلمة يتفلسف فيها إلا انه يبقي جذاب و مميز و خصوصا انه اللي بيحبه بيحس انه بيتعامل مع كائن راقي او حساس لدرجة انه واخد الحب لمكان ابعد من المادة و الواقع ..
انما حب له طعم و ملمس و لون ..

في الاخر مفيش اجمل من اننا نكون في علاقة حب صادقه 😍


cpd