[walaa farouk]

اللي يتحب من الله صح يقدر يحب اللي معاه.. اللي يستقبل حضن الله من غير شروط، يقدر يحتوي التعبان والمجروح والمكسور في دايرته ..
اللي شايف صورته في عيون الله وعارف هو غالي عنده اد ايه، مش هايرضى يرخص نفسه في علاقة مريضة أو حتى يقبلها على حد يخصّه..
اللي شايف جمال شخصية الله ودايق حُبه.. مستحيل يكون ناشف او جاف كدة في مشاعره.. هو لوحده هايعكس الصورة اللي دايماً باصصلها، صورة الله الطيب اللي مليان حُب..
واللي فاهم ذوق الله من كتر العشرة معاه، لوحده هايحب الموسيقى والفن ويقدرهم؛ لأنه شايفهم ادوات الله في اظهار جماله عن طريقنا.. هو اللي زرع حب الجمال فينا وادانا الفرصة نعبر عنه وندوقه ..
وبرضو اللي ملازم الله "القدوس" طول يومه، صعب عليه "يعُك".. صعب يخش بقلب كدة في سكك موت وهلاك.. حتى لو وقع أو اتكعبل في حاجة كدة في طريقه، هايقوم يتسند بإلهُه ويكمّل طريقه من تاني.. لأنه معاشر القدوس، يدوب نظرة ليه تكفي تشدّده وتصلب طوله من جديد ..
اللي فاهم هدفه وخطة الله ليه، مايستحملش يعيش تايه زي الباقيين، مايرضاش يضيع عُمره في متاهات .. مايقدرش يعاشر العدم ويتعوّد عليه، لأنه داق الحياة مع الله نفسه .. ومستحيل يفرط فيها مهما حصل..
آه "طوبي لأُناس عزُّهُم بك" يارب..
طوبى للي جرب يعيش معاك ويعتمد عليك ويطمن بوجودك.. طوبى للي عرف طريق الحياة وداقها معاك.. لأنه مش هايعطش تاني ابداً طول ما أنت موجود ..!