[walaa farouk]

حلو ان انت تلاقى حد تحبه ..

بس خلى بالك ..
من الكلام اللى بتقوله له ..

لأنك بعد فترة ..
ممكن تروح تقول له "انا من غيرك ولا حاجة"

ولا حاجة ازاى .. وانت اساس كل حاجة
بص حواليك كدة .. وانت هتعرف

الكون دا كله .. اتعمل عشانك
انت فعلا ليك قيمة ..
بذاتك .. مش باللى حواليك

حب واتعلق باللى حواليك ..
بس ماتخليش مفاتيح حياتك فى ايديهم

اللى خلقك
ادالك مفاتيح الفرح والسعادة
النجاح والطموح
الارادة والاصرار

بص حواليك تانى كدة ..
مجدى يعقوب ..
ذاكر ونجح .. حب واجتهد
طور نفسه .. وبقى فى الاخر مجدى يعقوب

ارجع كدة شوية ..
بيتهوفن اصم ..
وسيمفونياته بتتدرس

ارجع كمان ..
الفراعنة .. لغاية انهاردة ..
العالم محتار فى سر علمهم وتقدمهم

ارجع كمان ..
آدم .. ابويا وابوك ..
غلاوته .. كانت من غلاوة الحب اللى ربنا حبه له
وهو دا السر

انت غالى عشان ربنا هو اللى عمل لك قيمة
لما خلاك تقف كل شوية تكلمه وتقول له
يارب .. انا عايز
يارب .. اشكرك
يارب .. رحمتك
يارب .. عفوك
يارب .. رضاك

انت تقدر تعمل حاجات كتير..
وتقدر تفكر وتنجح ..
وتقدر تختار طريقك بمنتهى الحرية ..

بس وانت بتعمل كل ده ..
سيب لربنا مساحة ..
انه يتدخل فى الوقت المناسب ..
عشان ينقذك من نفسك ..

لما يكون اللى ضدك من برة ..
بيبقى سهل تحاربه ..

لكن لما يكون من جواك ..
ماحدش هيكتشفه غير اللى شايفك من جواك ..

بس هو عزيز جدا ..
مش بيتدخل فى حياتك غصب عنك ..

ادالك الحرية ..
حتى فى انك تختار انك ترضيه او تعصاه ..

اوعى تسيب مفاتيح حياتك فى ايدين حد
فرحتك وسعادتك .. بإيدك انت ..
هما اللى هيقووا ارادتك

وإرادتك .. جواك انت ..
هى اللى هتخلق فيك الطموح

وطموحك .. هينجحك انت
ونجاحك .. هيفرحك انت
شوفت .. ادينا رجعنا لأول حاجة قلناها ..
فرحتك وسعادتك .. ملكك انت ..

شفت بقى ان انت الأساس ..

لو ما بقاش عندك ايمان .. بقدراتك ..
اوعى ترمى اللوم على حد اتعلقت بيه ..
ولأنه مش مؤمن بيك .. فاتك ..