[Rena Jesus]

ما أنت عمرك ما هتلاقي نفسك وسط الزحمة .. و النظرات ... و الهمسات ...
عمرك ما هتلاقي نفسك في مجتمع ملوش قيم ....
مجتمع مشخص بكل ما تحمله كتب علم النفس من أمراض و عقد نفسية ....
مجتمع بينبهر بقاعات الأفراح و القايمة الباذخة أكتر من شهادات الماجستير و الدكتوراه و المنح التعليمية ....
مجتمع محبط و تعيس بيتقبل القبح بكل أشكاله ابتداء من المشاجرات اللفظية و استخدام الأسلحة في الشوارع على الملأ مرورا بالتحرشات الجنسية اللي خلته ياخد المركز الأول على مستوى العالم و يصنف كأخطر مدينة موجودة ممكن الجنس الأنثوي يعيش فيها ...
و تكدسات أكوام القمامة في الشوارع و عوادم السيارات اللي طالعة من مركبات سير محطمة قبيحة بتهدد سلامة أمن ركابها ...
و غيره و غيره من مظاهر القبح النفسي اللي المجتمع بتقبله برحابة صدر ...

ده المجتمع اللي أنت بتدور على نفسك فيه ؟!!
ده المجتمع اللي أنت رفضت تتجوز بنت حبتها كانت أكبر منك في السن ... أرملة... كانت تحت أي تصنيف رجعي آخر ؟!!
ده المجتمع اللي أنتي رفضتي منحتك التعليمية عشانه لمجرد أنك خايفة يتقال عليكي "عايشة برة لوحدك" ؟؟!!!!
ده المجتمع اللي أنتي خفتي تتعلمي "كمانجة" فيه و أنتي روحك فيها .. لمجرد أنهم قالولك "ازاي تكونى محترمة و تعزفي مزيكا " ؟!!
ده المجتمع اللي أنت اتخليت فيه عن أقرب و أجدع صاحب ليك لمجرد أنه قال كلمة حق و مخفش و خفت تتاخد معاه في الرجلين ؟!!!
ده المجتمع اللي أنت عمال تقصقص من جناحاتك عشانه ؟!!
و تتخلى عن مبادئك و أحلامك واحدة واحدة ... لحد ما خلاص ... بقيت "مسخ" !!!
ده المجتمع اللي أنت خايف منه و عامله حساب ؟!!!

تمام ..... ده تمامك ...
بس عشان خاطر ربنا يا أخي ... لما تشوف حد بيكسر القاعدة ...
لما تشوف حد مش خايف ... لما تشوف حد ماشي عكس التيار و برة القطيع ....
سيبه في حاله ... بلاش ضعفك و جبنك يتحولوا لحقد و كراهية عشان تحوله لنسخة "مسخ" منك ...
لو فاضل فيك ذرة خير ... ابقى قله " أنا كان نفسي أبقى زيك ... بس معرفتش ... يا بختك " !!!!!!