[walaa farouk]

أبوس إيدك عاملني علي اني غريبه...
آه ما تستغربش... عاملني كأني غريبه... افتح لي الباب زي ما كنت بتعمل زمان لما كنت غريبه عنك... قول لي لما تكلمني يا هانم زي ما بتقول لمرات زميلك الغريبه...
جاملني بابتسامه لطيفه لما عينك تيجي في عيني زي ما بتعمل مع الغرب...
اشكرني لما اقدم لك حاجه او اجهز لك غداك زي ما بتشكر الغرب لما بنتعزم عندهم...
اضحك علي نكتي البايخه زي ما بتضحك علي نكت اي ست غريبه...
لما اشتري حاجه جديده خد بالك منها وقوللي رأيك فيها "الكلمه الحلوه بتفرق معايا" والله بجد
ابتسم في وشي لو سمحت... اشمعني مسخسخ طول الوقت مع الغرب رجاله وستات...!؟
بص لي بإعجاب وجاملني زي ما بتجامل زميلاتك -الغرب- ده انا حتي حلالك ... مش هتاخد عليه ذنوب...!!!
ابعت لي رساله علي الموبايل من وقت للتاني او حتي نكته عبيطه تحسسني بيها انك بتفكر فيّه... مش كفايه راشق وشك فيه طول ما انت قاعد جنبي...!!!
وياسلام لو سبته شويه علشان خاطر تقعد معايا وتديني وقتك بطيب خاطر ورضا... مش لازم أشحت حقي فيك..!!!
ما تقارنش بيني وبين حد... ما تحسسنيش اني قليله او ناقصه... ده انا بتكسف أبص لراجل غيرك مش أبص واستحلي واقارن...!!!
لو قعدت في البيت.. ما تشيلناش جميله الله يسترك... انت صاحب بيت مش مأجر...!!
احكي لي اخبارك... جرب وأحكي لي عن اي حاجه بتحصل معاك زي ما بتحكي مع الغرب...
اشرح لي حاجه في الكوره او في الاقتصاد... هتقول لي "مش هتفهمي" عادي... هتقول لي "شرحت لك ١٠٠ مره وبرضه بتنسي" عادي... عادي ان فيه حاجات تقولها وانساها
ما انا طول عمري بقول لك الحاجات اللي بحبها واللي بتريحني وانت برضه بتنساها...!!!!