[walaa farouk]

.


بابا يسوع .. صباح الخير .. ممكن تفضل معايا ؟!
ممكن متسبنيش زي ما الناس بتسيب ..
ممكن تفضل بتحبني ..
انا ماليش غيرك ف الدنيا .. انت صاحبي اللي باخد رأيه ف كل حاجه تخصني .. و بابا اللي بيحتويني و يفرحني .. وحبيبي اللي مكفيني وبيغنيني عن كل الناس .. والهي اللي ساندني و بيحميني
امبارح بالليل وانا بعيط مكنش حد غيرك جنبي .. مكنش حد غيرك معايا .. اول ما بصيت ل صورتك حسيت كأن ايديك بتطبطب عليا و تضمني .. وسمعت صوتك بتطمني .. مكدبش عليك يارب انا تعبانه من حاجات كتير ف الدنيا .. ومحدش عارف ولا حاسس بيا غيرك .. الناس بتشوفني مبسوطه وبضحك وبخرج وبهزر .. وانت الوحيد اللي بتشوف دموع قلبي وبتفهمني ..
انت الوحيد اللي عمرك ما سألتنني مالك .. لأنك عارف من غير ما اقول
انت الوحيد اللي لما بحكيلك عن وجعي مبتقوليش معلش .. بتعمل كل حاجه علشان تبسطني وتنسيني وتعوضني ..
انا مش زعلانه ان حياتي فيها ألم ووجع .. انا بس عايزاك تسندني .. ولو مش هتشيل عني شيل معايا .. خليني ماشيه وانا ايدي ف ايدك .. ساعتها هنسي كل الحاجات المتعبه .. وهفرح بيك حتي ف وقت المشاكل والتجارب ..
انا عارفه انك راسم ل حياتي خطه ومشوار .. ومحضر ل قلبي مفاجأت عظيمه .. انا واثقه فيك ومصدقه .. بس متزعلش مني لما بضعف .. لما بنسي .. لما بتعب .. لما بغلط وبقع .. انت عارف ان بنتك شقيه ولمضه .. وانا عارفه انك هتستحملني
انا مش عايزه حاجه منك يارب .. انا عايزاك انت