[Rena Jesus]

أنواع من البشر "سيئة جدا" ممكن تاخد شوية وقت عشان تكتشفهم ....

_ النوع اللي بيخليك تتعامل بالنسخة القبيحة منك ....
شخص بيخليك تعمل حاجات مش من تكوينك و لا من طبيعتك ...
شخص عنده قدرة غريبة أنه يطلع أسوأ ما فيك .... يخليك تقول كلام تندم عليه ....
تقدم على تصرفات تخليك تحتقر نفسك ....
(تعلي صوتك في أماكن عامة ... تشتم أدام ناس متعرفهاش .... تكذب ... تخون أمانة ... تفشي سر .... الخ ......)
نوع بيضغط على أعصابك بشكل غير مباشر .....
في حالة أن في حياتك شخص من النوعية دي ... قولا واحدا .... "اقطع معاه" ...
ده شخص سام ... مؤذي ... بيحطك في حالة قوية من الغضب ...
و الغضب من أكثر المشاعر الغبية اللي بتعمي صاحبها ...
الغضب حماقة .... "اقطع" !!!!!!

_ النوع التاني أنا شخصيا بكرهه أكتر من النوع السابق ...
لأنه لئيم و أذاه النفسي مش مباشر ... و لو معندكش خبرة في الحياة ...
لو جمعتك صداقة أو أي علاقة مع النوع ده ... هيئذيك ... بشكل أو بآخر ....
النوع اللي بتكلم عنه هوة النوع اللي بيوصلك معلومات و صفات و تصورات عنك مش حقيقية ....
بيوهمك بحاجة مش فيك .... نصايحه أثرها قبيح على النفس..... و فيها جزء كبير من التعالي و الكبر ...
ممكن يوهمك أنك أضعف شخص في الحياة لمجرد أنك بتمر بمرحلة من الانسحاب و التراجع في الحياة و ده طبيعي و منطقي جدا لأنك "بشر" ....
ممكن يحسسك ب"قد ايه أنت ايه و متخبط و على طول محتاج حد يرشدك و يوجهك " أو يحسسك بأنك "عالة" و "عبء" ..... و غيره و غيره ...
بتبقى ماشي من عنده محبط و مكسوف من نفسك ... و مش فاهم أنت حاسس بكده ليه ...
لأن على أرض الواقع الراجل مقلش حاجة واضحة و صريحة ..... حطلك السم في العسل .....
نوع سيء و خبيث .... "اقطع" ...

_ النوع الثالث و الأخير من الشخصيات السلبية .... النوع اللي مبيقدرش ....
النوع اللي مبيقلش شكرا ...
النوع اللي بيتعامل مع المعروف اللي بتقدمهوله كحق مكتسب و حاجة أنت مفروض متتكلمش عنها أساسا و لا تحسبها .....
حلو ان البني آدم يبقى معطاء يا جماعة وجدع و ابن بلد و سداد و كل الكلام الكريم شانتيه ده ....
بس مش حلو أنك تبقى "عبيط" أو "عامل نفسك عبيط" .....
التقدير حلو و الاحساس بالامتنان واجب على صاحب الحاجة .... دي الأصول ....
كلمة "شكرا" دي لازم تتقال ..... و تتقال من القلب ....
و اللي أحلى من كلمة "شكرا" الفعل ..... اللي بيرد غيبتك و بيسد مكانك ....
اللي بينفي حاجة مش فيك تحت دليل قوي اسمه "أنا عاشرت فلان" ....
الناس اللي مبتعرفش تعمل كده .... الناس دي ترجع مكانها الطبيعي ....
الناس دي متستاهلش أنك تعمل معاها أي مجهود فوق العادي و لا تستاهل الجميلة والمعروف .....

و أخيرا يا جماعة الخير .... قسموا الناس .... الناس درجات ...
الناس أفعال و مواقف في وقت الجد .... و افتكر دائما و أبدا ....
صاحب الكل مش جدع .... صاحب الكل ملوش مبدأ ....صاحب الكل وحيد ....
اتكلموا ..... عبروا ...... انطقوا ..... حسوا ..... .
خدوا قرارات شجاعة كل يوم و كل ساعة .... عيشوا صح ....