[Rena Jesus]

ليه طنط كل ما تشوفيك بتسألك "حنفرح بيكي أمتي ؟! "

كبشر بنعيش في مجموعات هدفها التواصل و التعايش مع بعض ..
بس للأسف ساعات بيتوجد وسط المجموعات ديه ,,
أشخاص بتمارس دورها التعايشي بطريقة مستفزة شويه ,,
و من الطرق ديه أنها تسأل اسئله ملهاش اي 60 معني و لا هدف غير انها تقتحم خصوصياتك بشكل سافر سواء بشكل مباشر او غير مباشر ,
فتسرق من وقتك , مجهودك , سعادتك و ثقتك بنفسك !! ,
الناس ديه طلع عليهم أسم غير علمي و هو الـ Askhole

الـ Askhole , حسب الـ Urban Dictionary ,
هو الشخص اللي بيسأل اسئله ملهاش إي ستين لزمة ,
بدايةً بالشاب او الشابة اللي في الكلية بيفضلوا يسألوا أسئله برا موضوع المحاضرة لمجرد انهم يظهروا أو يبانوا و كل اللي في المدرج يركز معاهم و يكون عاوز يقوم يغتالهم عشان المحاضرة تخلص و يقوموا يروحوا !!
مرورا , بصاحبك او صاحبتك اللي كل شوية يطلب/تطلب رأيك او نصيحتك , فتفتضل تتكلم و تناقش و تتعب نفسك و هي/هو في الاخر يعملوا برضة اللي في دماغهم ,
نهايةً , بعمو أو طنط , اللي بيسألوا اسئله عقيمة بغضية زي "حنفرح بيكي امتي ؟! "
" مش شايفه انك تختني اوي يا حبيبتي ؟؟ " ,
"مش ناوي تلاقي شغل و لا ايه ؟! " !! ..

بس ليه فيه Askhole ؟؟
في مقالتها
Why People Ask You Awkward and Annoying Questions ,
بتقول الكاتبة F. Diane Barth ,
ان في كذا سبب بتتخلي الناس Askhole :

1- بيسألوا اسئلة لمجرد السؤال , فهما مش متعمدين يضايقوا اللي حواليهم ,
بس عشان يكسروا حاجز التوتر او عشان يبانوا اجتماعين , فبيسألوا اي حاجة و خلاص ,

2- عندهم عُقد نقص , بيحاولوا يسقطوها علي غيرهم بالسؤال ,,
فمثلا هما شخصيات كيئبة في حياتها ,
فبتتعمد تسأل اسئلة تدخل الشخص اللي تم سؤاله في حالة من الحزن علي النفس او الندم , و بكدة يحسوا انهم مش لوحدهم عالم كيئبة !

3- هما فعلا عاوزين يتطمنوا علي الشخص اللي بيسألوا عليه و حابين يتواصلوا معاه ,
فسؤالهم ده بيكون فعلا بغرض المساعدة مش الشماته او الضرر

فنصيحة الكاتبة F. Diane Barth
للناس اللي بتتعامل مع الـ Askhole ,
هي أنهم بلاش ينطوا علطول علي ان كلهم ناس مريضة و غرضهم مش كويس ,
أنما يحاولوا يتعاملوا معاهم انهم عاوزين يطمنوا عليهم بسؤالهم ده او فعلا عاوزين يستفهموا من غير اغراض خفية من السؤال ..
و في نفس الوقت يكون عندهم الثبات و الثقة في إجباتهم ,
فالإجابات تكون قاطعة و مفهاش رغي كتير عشان الـ Askhole عندة قدرة خرافية في الهري و خلق اسئلة تافهه ! ,,
أما لو الـ Askhole لسه متمادي في اسئلته الغبية المستفزة ,
يفُضل لو الشخص يحاول ميجادلش او يكمل في الحوار ,
أنما تكون الإجابة بكل حزم :
"شكرا جدا علي اهتمامك , بس انا أفضل متكلمش في الموضوع ده دلؤتي ! " ..

في النهاية , لازم تعرف , ان وقتك و مزاجك و صحتك النفسية أغلي عندك بكتير , من إنهم يضيعوا علي Askhole ..