[walaa farouk]

ليه بطلبك ومش بلاقيك؟! كام حد سأل ربنا السؤال ده قبل كده؟!
الله أعلن عن حاجات كتير في الكتاب المقدس ممكن تعطل استجابة الصلاة بس للأسف أوقات كتير مش بناخد بالنا من الحاجات دي، يعني زي مثلاً لما الرب يسوع قال " لو وقفت تصلي وافتكرت إنك زعلان من حد أو حد زعلان منك، سيب الصلاة واللي واقف بتعمله وروح صالح أخوك، وبعد كده تعال كمّل صلاه" قدام وصية زي دي أنت بتعمل إيه؟ كام واحد فينا بيقف يصلي وهو زعلان من أقرب الناس ليه؟! وبنزعل ونتضايق لما ربنا مايستجبش لصلاتنا، خلوا بالكم لما بتكسروا وصية من وصايا الله، فيه عدو قال عنه الكتاب إنه المشتكي بيجي يقف قدام ربنا ويشتكي علينا وساعتها بيبقى ليه الحق إنه يعطل استجابة الصلاة لأننا كَسرين وصية مهمة زي دي!! لو مش قادر تسامح أطلب من ربنا يديك قوة ، الغفران بيشفيك أنت وبيصلَّح نفسيتك قبل ما بيصلَّح علاقتك مع الشخص التاني..
وأنت بتقرا الكلام كده، جه في دماغك حد محتاج تكلمه وتصالحه ولا لأ؟!