[walaa farouk]

لو قاعد في أوضة ضلمة بقالك فترة، هل ده معناه إن النور مش موجود بره؟!

ممكن حد يفكر ويقول أن الحياة ظلمة وسودة ووحشة ومفيهاش نور، لكن الحقيقة أن هما اللي مش عارفين يشوفوا النور، أو قاعدين في الظلمة، ووجودهم في الظلمة مينفعش يلغي وجود النور والشمس، ولو هنتكلم بالمنطق من سنين كتير جه شخص أسمه أيدسون اخترع المصباح اللي تطور وبقى لمبات بتنور في كل مكان، وفي نفس الوقت اختراع المصباح ممنعش أن في أماكن ممكن تفضل مقفولة وظلمة لا بيدخل ليها نور ولا شمس لانه ممكن يكون صاحب المكان مش عايز يدخل النور فيه.

لو مصدق إن فيه إله هتصدق في المعجزات!

نفس الفكرة لما نقول أن مفيش حاجة اسمها معجزات وأن المعجزات دي علشان هي أمور فوق الطبيعة فمستحيل تكون موجودة، في الحقيقة أن اللي بيقولوا كده هما اللي مش عارفين يشوفوا أو مش قادرين يصدقوا أن ممكن يحصل حاجة فوق الطبيعة، بنفس مبدأ وجود المصباح والشمس مش بيمنع وجود أماكن مظلمة، وأن وجود أماكن مظلمة مش بيدل أبداً على عدم وجود نور، نقدر نقول أن وجود قوانين للطبيعة مبيمنعش أبداً حدوث حاجات فوق الطبيعة ولانها من اسمها باينه معجزة، يعني مش حاجة متعودين عليها انها تحصل ولأننا أوقات مش بنبقى قادرين مصدق ده، بس الله سهل عنده يعمل المعجزة دي لأنه إله المستحيلات وكل اللي بالنسبة لنا صعب ، الله يقدر يقوينا ويعدينا منه، لو أنت مؤمن بوجوده، هتصدق فيه لأن إلهك حي