[walaa farouk]

ايه أحلى حاجة في العيد؟؟
- الأجازة
- اللمة الحلوة وسط العيلة
- الأكل والخروجات
دي كلها أمثلة لإجابات معظمنا بيقولها أو يسمعها.. لكن يا ترى هيكون إيه إحساسنا لو حد قال: أنا مابحبش العيد

- معقول فيه حد مايحبش العيد؟!.. فيه حد يحب النكد والكآبة؟!
هو أكيد محدش بيحب النكد، لكن دا مايمنعش إني ممكن أحس بمشاعر سلبية في أيام العيد.. ممكن ألاقيني داخل في اكتئاب كل ما يقرب وقت العيد.

- طيب ليه؟.. وازاي العيد يتحول لمناسبة كئيبة؟!
اكتئاب الأعياد معناه إن فيه رابطة قوية في ذهني ومشاعري بين العيد والحزن.. الرابطة دي بيكون سببها ذكريات مؤلمة.. ذكريات حصلت زمان في طفولتي (أو في وقت سابق) وبالصدفة كان حدوثها متزامن مع وقت العيد.. أو إني أكون افتقدت حد عزيز عليا في الوقت دا.. بعدها بيكون العيد بالنسبالي مرتبط بمشاعر الفقد والألم النفسي.. أو مثلا يكون جو العيد اتحفر في ذاكرتي بإساءات كانت بتحصل ليا في لمة العيلة، أو بالخناقات والتوتر اللي كان بيحصل زمان في بيتنا بسبب لبس العيد ومصاريفه.. ساعتها هيرتبط العيد جوايا بمشاعر الذنب، لأني - بعقلية الطفل- كنت بحمّل نفسي ذنب الخناقات دي.. ممكن كمان يكون العيد مرتبط عندي بذكريات جميلة، لكن راحت ومش راجعة تاني.. ودا معناه إني هحس بوجع الحنين والحسرة على الأيام الحلوة، كل ما يقرب وقت العيد.. طبعا الأمثلة كتيرة والخبرات مختلفة من شخص للتاني.. لكن المشكلة الحقيقية لما بتكون الذكريات دي قديمة لدرجة اني نسيتها.. أو مؤلمة لدرجة اني - بشكل غير واعي- تناسيتها.. ساعتها بلاقيني مش مبسوط بالعيد لكن مش فاهم ليه!.. وكل ما ألاقي ناس حواليا مبسوطة وفرحانة أحس اني غريب، واتضايق من نفسي ومن مشاعري.. في الوقت دا بيكون قدامي عادةً حل من اتنين.. يا إما انعزل واكتئب أكتر، يا إما أنكر مشاعري وأعمل نفسي فرحان بالعافية!.. والنتيجة في الحالة دي إن فرحتي بتكون مزيفة.. والفرحة لما تكون مزيفة بيكون التعبير عنها مبالغ فيه جدا.. وممكن كمان ألجأ لسلوكيات غير صحية عشان أعبر بيها عن فرحتي الغير صحية.. ومع الوقت بالاقيني غرقان في محاولات فاشلة بضحك بيها على نفسي عشان أغطي على وجعي وشعوري بالاغتراب.. طبعا كل دا بيتم بشكل غير واعي، لأني أصلا مش بابقى واعي بإن عندي صندوق اسود مليان ذكريات مكتومة.. ذكريات محتاجة نور وهوا عشان تتشاف وتتحكي.. محتاج إني أواجه كل الوجع اللي فيها عشان أقدر أتعافى من تأثيره السام عليا.

- هل هي دي بس أسباب اكتئاب الأعياد؟
طبعا لأ.. لكن دي أشهرها.. إنما فيه أسباب تانية ممكن مايكونش ليها علاقة مباشرة بالماضي وذكرياته.. ممكن بالصدفة العيد يقرب وأنا ماكونش في أحسن حالاتي النفسية.. لكن لأن المجتمع مابيرحبش بالمشاعر السلبية ولا حتى المشاعر المختلفة، بضطر أعمل نفسي فرحان زي الباقيين.. وكمان بخاف لو يبان عليا حزن فأكون سبب في كآبة اللي حواليا.. وساعتها هحس بمشاعر ذنب فوق كل الوجع اللي انا فيه.. عشان كدة بيكون أسلم طريق هو انكار حزني والغَلْوَشة عليه بفرحة مصطنعة.. والنتيجة وجع أكتر واكتئاب أكبر.
خلاصة القول: العيد مش فرحة اجبارية.. أصلا مفيش فرحة تيجي بالعافية.. مفيش في المشاعر كلمة "لازم".. لكن ممكن العيد يكون فرصة أخفف بيها على نفسي.. بس ازاي؟؟
بحتاج أكون على وعي بإن مشاعر الحزن والكآبة مش عيب.. مش حاجة تكسف لازم أنكرها أو أخبيها.. بالعكس أنا محتاج أدوّر عن أسبابها وأقبلها وأعبر عنها.. محتاج أشارك بيها لأشخاص قادرة تقبلني وتحترم مشاعري في كل حالاتها.. أشخاص واعيين بإن مساندتهم ليا في حزني مش هتأثر على حالتهم النفسية ولا هيخلوني أحس بالذنب لما أشاركهم بألمي.. ساعتها هرتاح والحزن جوايا هيخف شوية شوية.
خلينا نستغل العيد في إنه يكون فرصة تخلينا حقيقيين.. أصل السعادة اللي بجد مش هنحسها طول ما احنا بننكر ونعمل نفسنا ناسيين أو مبسوطين.. السعادة اللي بجد هحسها لما يكون برايا زي جوايا.. حتى لو الحزن لسة ماراحش، بس ع الأقل مش هحس اني مجبر على تمثيل الفرحة.. لكن هكون فرحان بنفسي لأني حقيقي.. ساعتها يمكن يبقى العيد فرحة!