[walaa farouk]

هل بتخافي تقولي رأيك قدام الناس؟
هل بتحسي بقلق من أن حد ينتقدك أو يتريق عليكي لو قولتي رأيك؟
ياترى لما بتدفعي عن حقك بتعلي صوتك وممكن تقولي كلام تندمي عليه بعد كده؟
لو حد احرجك أو أتريق عليكي قدام الناس بتلاقي نفسك متوترة ومش عارفة تردي؟
هل ساعات بتلاقي نفسك بتعملي حاجات انتي مش عايزة تعمليها عشان ترضى الشخص اللي بتحبيه؟
ياترى لو ليكي فلوس عند حد بتترددي كتير في انك تطلبيها ؟
لو إجابتك بنعم على الأسئلة ديه يبقى محتاجين ندرب على مهارة اسمها توكيد الذات يعني محتاجة:
1- تثقي في نفسك وامكانياتك وذكائك وقدراتك ومهاراتك وشكلك ومظهرك.
2- تحددي احتياجاتك وحقوقك وتحطي اهدافك وتنفذيها ، وما تنتظريش من الاخرين انهم يحددوا حقوقك واحتياجاتك "كده هتستني العمر كله "
3- خليكي هادئة في الموقف ومستوي صوتك ما يبقاش عالي عشان مش عايزين نخسر حقنا ومش عايزين نعمل عداوات مع حد لانك محتاجة مساعدة الناس.
4- مهم قوي انك تعبري عن رأيك وافكارك ومشاعرك بطريقة بسيطة اول بأول بكل ثقة من غير ما تكبتي.
5- لو اتسألتي عن رأيك قومي بكل هدوء وقولي رأيك وواجهي خوفك لانه بيكبر جواكي طول ما هو بداخلك .
6- تقبلي النقد حتي لو كان سلبي بكل ترحاب.
7- قولي لأ من غير خوف وبكل حزم وجدية واتدربي عليها كتير لان ديه مهارة صعبة وبالذات مع الناس اللي متعودة انك توافقي علي اي حاجة يقولوها دون اعتراض خوفا من زعلهم او رد فعلهم .
8- دربي نفسك علي كلمات زي انا عايزة ، انا محتاجة ، انا حاسة.
فيه اوقات الموقف بيقتضي ان ما ادافعش عن حقي في وقتها ، مفيش مشكلة ، الافضل اننا نسكت لان الكلام ممكن يزود الموقف وبعد ما الموقف يهدي حضري كلام مناسب وعبري عن رأيك .