[walaa farouk]

انا مش عارفة اعمل ايه ياربي. المدارس على الأبواب وابني عانيت معاه السنة اللي فاتت بسبب الإنذارات المستمرة من المدرسة والمكالمات تقريبا اليومية " لو سمحتي تعالى خدي ابنك لأنه متعاقب بسبب عنفه مع زمايله والعند مع المدرسة واخد رفد لمدة يوم" والتهديد بأنه مش هيكمل السنة اللي جاية لو فضل يعمل السلوكيات ديه ، وفي البيت مش بيقعد خالص وطول الوقت بيتحرك ومش بيسمع الكلام وبيعند طول الوقت ومش بقدر امسك نفسي عن ضربه وياريت كمان فارق معاه ومش بيسيب اخته في حالها وطول الوقت ضرب فيها بحجة أنها مش عايزاه يلعب معاها ولما اتكلم معاه لما يعمل غلط يقولي " سوري " وبعدها بلحظات يكرر نفس السلوكيات الغلط ، لما بجي اذاكر له بيرغي في أي كلام ويسأل عن أي حاجة الا في الدرس اللي قدامه والواجب ياخد في ايده ساعات لكن لو قولتله هتلعب بالتاب يخلصه بسرعة بس للأسف معظمه غلط وكل حاجة اشرحها اجي اسمعهاله كأني قاعدة مع واحد تاني مش فاكر اي حاجة مع انه ذكي وفي الالعاب علي التاب بيوصل لاعلي المستويات في اللعبة . تعبت ومش عارفة هو ليه كده مع ان لما بناقشه في تصرفاته بيبقي فاهم وعارف انه غلط.
اعمل ايه؟؟؟؟؟؟؟؟؟
عشان نحدد طريقة العلاج المناسبة للطفل ما ينفعش اعتمد بس علي شكوي الام لكن لازم كمان يتعمل اختبارات نفسية للطفل زي اختبار الذكاء لمعرفة التركيز ومدي الانتباه والذاكرة السمعية والبصرية واستجاباته علي الاختبار واندفاعيته ومستوي الحركة اثناء الاختبار وغيرها من الاختبارات النفسية اللي بتقييم المشكلة من جميع الجوانب عند الطفل