[Mary Naeem]

المسيحيين مش مشركين

راكب ميكروباص بالليل وراجع من الشغل ، جاتنى مكالمه مهمه فى التليفون بس للأسف ماكنتش سامع حاجه عشان السواق كان مشغل الكاسيت على أعلى صوت .
فضلت أنادى عليه ياسطى ، ياسطى وطى الصوت ، مافيش فايده ، قومت اتنرفزت وعليت صوتى جامد عليه ، شديت انا والسواق اقوله مش سامع ، يقولى لا ، ولو مش عاجبك انزل من العربيه ، قمة التناحه يعنى وقلة الذوق .
المهم الناس اتدخلت وهدو المشكله والسواق وطى الكاسيت بعد ما الكل غلطه
الناس هدونا وخلاص ياجماعه وحدوا الله
فا قولت لا الاه الا الله .
الراجل اللى جنبى قالى مش انت مسيحى ؟
قولتله اه
قالى أمال ازاى بتقول لا إلاه الا الله ، هو مش انتو مشركين وبنعبدوا تلات الهه
بصراحه انا ماندهشتش لأنى عارف سوء التفاهم
بس قولتله
هو انا لو ضربتك بالقلم دلوقتى تزعل ؟
قالى انت ماتقدرش تعملها دانا اشقك نصين ، انت دمك حلال اساسا بالنسبالى .
قولتله سيبك من الحلال والحرام دلوقتى وخلينا فى موضوعنا ، انا دلوقتى هاضرب وشك ، مالك انت ؟
قالى انت مجنون ؟ قولتله لا انا مسيحى 😄
زى ما وشك وايديك وضهرك جزء منك ولو تعرضت لأى جزء منهم يبقى تعرضتلك انت شخصياً ، احنا بردو كدا
الأب ، والأبن والروح القدس التلاته لآلاه واحد .
زى ما ده اسمه وشك ، وده اسمه دراعك بس فى النهايه كل دول انت
احنا مش مشركين ، احنا بنصلى بنقول بالحقيقه نؤمن بالاه واحد .
وعلى جنبك ياسطى ، والسلام عليكم .
بقلم/#كيرلس_فتحى