[Rena Jesus]

في الاوبن داي 💄بشوف العجب ٤ مواقف مش هنساهم ابدا 😢
اتعلمت منهم حاجات مهمة اووي

هقولكم عليها احكيلكم الاول :

١. زوجة بتقف عندي وبتسألني بكام ارخص مانيكير قولتلها ٥ج
قالتلي تمام اختارت لون ووقفت استنت جوزها اللي جاي من بعيد وبتقولي اللون دة نفسي فيه من زمان وفرحانة اني لقيته😘 وهي بتضحك
جه جوزها بتقوله رد ايه التفاهة دي هاتي تشيرتات للعيال احسن خلي عندك دم 😭 اتصدمت جدا من الرد وهي في لحظة اتكسفت ووشها اصفر وبصت علي المانيكير وسابته من ايديها وقالتلي شكرا ومشيت وهي مكسوفة ومتضايقة جدا مع العلم ان جوزها في ايده علبة سجاير l.m واكيد بيشتري كل يوم.

٢. اب كبير في السن بيقولي وريني احلي واغلي حاجة عندك عشان بنتي 😍😍😍 فرجته ندالها من بعيد وجات قالها هاتي يا بابا اللي نفسك فيه
والبنت مكسوفة ووشها من الفرحة كان منور اختارت روج وفضل يلح عليها وايه تاني وايه تاني اختارت حاجة تاني بالعافية وهي مبسوطة اوووي اووي وباين عليها فرحتها مش بالحاجة قد حضن باباها وهو بيشاركها ويختارلها 😘😘
خدي دة يا بابا لونه بنوتاتي الموقف عجبني اووي وفضلت مركزة معاه لحد ممشي 😄😄

٣. بنت جميلة شابة ومعاها اخوها اصغر منها عندها جرح مضايقها جدا في وشها وجيالي مخصوص عشان تاخد ديرماكول تداري الجرح
ولما ملقيتش درجة مناسبة اتضايقت جدا اخوها بصلها وقالها صدقيني وشك جميل اووي مش محتاج انتي اللي مركزة مع الجرح لكن اللي يشوفك هيركز في حلاوتك مش في الجرح 😍😍
البنت سمعت الكلمتين دول واتبسطت اووي ورجعتلها ثقتها في نفسها لمجرد كلمة حلوة سمعتها 😋😋

٤. زوج وزوجة ومعاهم ٣ اطفال منهم بيبي بيرضع وقفت الست تتفرج اخد منها البيبي وفضلوا ينقوا مع بعض درجة روج تليق عليها اختارت درجة قالها لا دي عندك منها هاتي اغمق 😘
ترد لا مش عندي لا عندك بس انا مش فاكرة اني معايا دي
قالها لا معاكي وكانت ماركة ماك واشتريناها مع بعض السنة اللي فاتت من اسكندرية
تضحك الست وتفتكر وتقوله انت فاكر حاجتي 💄💄وانا نسيتها
يرد بقي انا مش فاكره هو انا فاكر فرحتك بيه يومها عملتي فرح لما لقتيها 😍😍😍

الخلاصة 😄😄 تصرفات الراجل بتنعكس علي الست اوووي هو اللي في ايده بكلمة او حاجة بسيطة يسعدها 😍😍😍😍😍
وهو كمان اللي بكلمة بسيطة يتعسها ويطفي نور حياتها 😇😇الاهتمام ثم الاهتمام ثم الاهتمام

الراجل الاول كان ممكن ب٥ج بس يفرحها سنة قدام عكس تصرفه كسفتها هتخنقها سنة قدام ومش
هتنسهاله ابدا 😭😭
الاب وحبه لبنته ودلعها هيخليها تطلع شبعانه نفسيا من محبة وعطف ابوها اللي محدش يقدر يعوضة 😘
الاخ هو سند البنت ومرايتها هو اللي بيخليها تحس بالامان حتي لو هي مش واثقة في نفسها 😇
الزوج اللي بيهتم بالتفاصيل الصغيرة اللي بتسعد مراته ويهتم بيها وبمشاعرها هيسعدها طول العمر ومش هتنسهاله ابدا وهتردهاله فرح وسعادة جوة بيته اضعاف 😘😘😘😘

يوم من الحياة بتفاصيل واقعية جدا جدا