[walaa farouk]

قلوب الناس اشكال والوان .. محتاجه سنين علشان تبان
قلوب تسكنك قلوب تملكك .. وقلوب تانيه تلاقيها تتعبك

قلوب وافيه على طول مخلصه .. بطيبه وعفويه بتكون كويسه
قلوب جواها ابيض وجميل .. كلها حب مليانه خير

وقلوب تدمر من غير احساس .. تحسها حيه وهى ماتت خلاص
تعمل معاها حلو كتير .. بس لونها اسود ليل

قلوب حنينه تعطف عليك .. حب وحنان تلاقيها تديك
كل همها انها تطمنك .. تتحمل الالم بس تسعدك

وقلوب جامده متحجره .. تقرب منها ترجعك لورا
تعرف تطعنك بين الضلوع .. تجبرك دايما على الدموع

قلوب تهون عليك الصعاب ..تفتح قدامك كل باب
مش ممكن ابداً تسيب ايديك .. لأخر لحظه ماسكه بيك

وقلوب تموت الفرح فيك .. تزيد فى جرحك وتيجى عليك
تقيد بركان جواك يخليك .. تطفى كل نور حواليك

قلوب تحبك مهما تكون .. تغفر تسامح دايماً تصون
تحس بيك من نظره عنيك .. تخاف عليك لحد الجنون

وقلوب مليانه بالأسيه .. متعرفش بس غير الأزيه
مهما تكون امين معاها .. متلقيش منها غير سوء النيه

آدى الناس وآدى ضمايرها .. وياما قلوب بنتعلم منها
بس انت خلى قلبك حساس .. يحس ويقدر أوجاع الناس

حتى لو قلبك مليان بالآهات .. لو مايملكش غير السكات
خلى قلبك دايماً طيب .. من كل حزين خليك قريب

خلى قلبك مليان حنان .. طيب خواطر اللى داقوا الحرمان
خلى قلبك يكون كبير .. مع الضعيف مع الكسير

خلى قلبك غير باقى القلوب .. أصلك أبن فاحص القلوب
قول لنفسك لو قلبى قاسى .. هاخسر نفسى ويضيع خلاصى

عماد حسنى