[walaa farouk]

مفيش أوجع من انك تحاسب شريكك علي اختيارك ليه !!

* اخترتها مليانه ومقرر من جواك بعد الجواز تخسسها او العكس !!

* شفتي أهله ومكنوش داخلين دماغك من ايام الخطوبه وبعد الجواز معايره وتطاول وصب السخط عليه !!

* كان نفسك في واحده بتشتغل واتجوزت اللي مش من أولوياتها الشغل !!

* اتجوزتيه عملي وكنتي لامسه جدا انه مش عاطفي وكل يوم تحاسبيه ان مهارات التعبير عن الحب عنده مش احسن حاجه !!

وبعدين
بتكرهوا بعضكم في بعض
بتشيلوا نفسكم من بعض

بتبهدلوا رصيد المعزه اللي جواكم لبعض
ومره علي مره حاجز الاحترام يتكسر
ومره علي مره تحسوا انكم
وصلتوا للنهايه

لمجرد انكم او واحد منكم قرر يحاسب التاني علي اختياره 😓

تحملوا مسئوليه اختياركم

تقبلوا عدم الكمال

اسعوا للاحسن من غير ما تحسوا ان الطرف التاني ظالم مفيش حد يقصد يظلم بطباعه او اختلافه متقرنش شريكك بلقطه عجباك في حد تاني
اللي عجبك لقطه مش شرط لو دخلتوا في العمق يعجبكم كل اللقطات

دوروا بدأتوا ليه تلاحظوا العيوب اوي كده
محدش بيطلع عيوب غير لو كان حاسس ان العلاقه نفسها متوتره

زي الاتنين الصحاب
طول ما هما كويسين مع بعض بيعدوا لبعض كل حاجه
او ما يقلبوا يطلعوا القديم والجديد

مفيش اتعس من انسان باصص بس لنقط ضعف اللي حوالليه
ومفيش اسعد من انسان مش بيتحرك غير لو الموضوع مؤثر وبيفرق
بيختار هيحط طاقته ومجهوده في ايه
بيختار يبني
بيختار يحب
متوغلوش صدوركم
متمشوش ورا الشر