[walaa farouk]

بصوا بقا يابنات الموضوع ده هنزل فيه كل تكات وحركات ست البنات وست الستات كمان

هنزلكوا دايما شوية نصائح لبيتك ولمطبخك ولحياتك كست عموما تابعونى هنا وكل يوم نصيحة جديد لست الستات
ويارب تستفيدوا معايا ياقمرات




1--الملوخيه انتى وبتسويها متضعيش عليها الغطاء الا وقت الطشه وتشليها علشان متسودش منك وتفصل
*****************
2--بعد ما تقورى الباذنجان ادعكى ايدك بليمونه علشان متسودش او البسى جونتى وانتى بتقورى
*****************
3--بعد ما تخلصى خلطه المحشى وقبل ما تحشى ضعى للخلطه ربع كوب زيت بتخلى المحشى يلمع وطعمه جميل "
*****************
4--لو بتعملى الرز بالسمنه يبقى اول ما تضيفى الميه ابقى ضعى فى الماء معلقة زيت علشان يطلع مفلفل وبيلمع "
*****************
5--قبل ما تقلى الباذنجان رشى عليه ملح وحطيه فى مصفاه على الحوض هينزل كل الميه ومش هيشرب زيت فى القلى "
*****************
6--اللحوم وهى بتتسلق لو عاوزه تزودى ماء زودى لها ماء مغليه وليست ماء ساقعه لان الساقعه هتخليها من غير طعم "
*****************
7--وانتى بتعملى صنية رقاق ضعى ربع معلقة شاء بيكنج بودر فى الشربه اللى هتزقى بيها الرقاق هيبقى مورق ومش هينشف منك
******************
8--الكفته اعمليها بالبرغل هيمتص الميه وهيحافظ على حجم الكفته "
******************
9--ضعى معلقة ماء مثلجه فى بيض البانيه .هيفضل الزيت نظيف لحد اخر قطعه "
******************
10--استبدلى اللبن فى الكيك بااى مشروب غازى مثل الميرندا او السفن اب هيخليها هشه ومرتفعه "


استنونى بكرة ونصايح تانية جديدة ....