بقلم: ولاء فاروق
بس تبقى موجود
بس تبقى موجود
اسف لأني بصيت علي الواقع الصعب، وتخيلتك ضعيف قدامه..
ولما غرقت حاولت أرفع نفسي بنفسي.. وأتاريني باغرق نفسي اكتر..
اسف لأني فكرت الناس أذكي منك.. ومشيت وراهم.. وأتاريني بخرب حياتي في بُعدي عنك..
اسف لأني فكرت أن أحتياجاتي الجسدية وغرايزي أقوي من انك تقدسها..
وتخيلت أن جوعي العاطفي أصعب من أنك تشبعه..
اسف لأني فكرت الحزن اللي جوايا أكبر من انك تشفيه..
وتصورت أن حياتي الخربانة أصعب من أنك تصلحها.. فا أستسلمت.. وبغبائي شوفتك أنت السبب.. فا بعدت عنك..
اسف علي بدايتي الصح.. ونزولي من المركب.. من غير ما أحسب بقيت المشوار هايكمل ازاي..
*****
وشكراً علي أمانتك.. أنك في كل دا موجود مابتتغيرش..
شكراً علي سندة ايدك برغم غبائي الكتير وقُصر نظري..
شكراً علي عتاب الحبيب "لماذا شككت؟"، وسط بشر مابتعاتبش ومابترحمش.. وبتستني مني غلطة عشان تبعد..
شكراً علي وجودك.. حتي لو في الهزيع الرابع.. أنا راضي بكدة صدقني..
راضي بأي وضع ومكمل في أي عاصفة..
بس تبقي موجود..