الانسحاب الآمن ..
فيه علاقات مهما كانت لطيفة و جميلة .. او حتى ملزمة و مفروضة .. او حتى انت سعيد و مبهور بيها
بيكون ليها جانب ب يدمرك تماما ..
بيحطم خلايا مخك و يشل تفكيرك ..
علاقة فيها حاجات حلوة اه بس فيها حاجة او " حاجات " تودي في ستين داهية ..
اما بتفوق للجزء المدمر دا بتبقا عاوز تمشي .. تهرب .. تنفد ب جلدك و تلحق اللي فضل منك ..
المشكلة انه عدوك الاول في العلاقات دي هوة ... إنت .. !
انت اللي بتبقا مش عاوز تمشي ! .. مش عارف تمشي .. عارف انك بتتدمر و ها تتدمر اكتر و اكتر لو فضلت .. انما الجزء المستريح منك ها يساعدهم في تدميرك اكتر ..
وتلاقي نفسك واقف محلك سر .. بتتفرج على روحك وهيه ب تتقطع حتت ..
اقولك الحل ؟
الانسحاب الامن ..
لو مشيت مرة واحدة ها تبقا عامل زي اللي عمل بتر مفاجيء ل حتة منه ..
وجع رهيب .. صراخ .. عذاب حقيقي .. خيالات عن الناس اللي انت سبتهم و حنين قاتل .. و مش بعيد تحس انك مذنب كمان انك سبتهم .. مع انك انت الضحية اصلا !
روح و ارجع ..
غيب يومين تلاتا و بعدين اظهرلهم ..
اكسر روتينك معاهم ..
الحاجات اللي كانت لازم .. خليها ب ظروفها ..
اعمل زي اللي راكب مرجيحة و ب يتمرجح ب اقصى سرعة و قرر انه عاوز ينزل من ع المرجيحة ..
ها يفضل يبطأ في سرعتها .. حبه .. بعد حبه .. بعد حبه .. لحد ما المرجيحة " تقف " تماما
ساعتها ها ينزل من غير خسائر ..
زي ما اديت نفسك وقت وانت بتدمرها في اي علاقة .. اديها وقت زيه عشان تخرجها منها ب .. سلام ..