[walaa farouk]

- ليا واحدة صاحبتي قبل ما تتعرف علي الشخص اللي بتحبه كانت ديماً بتشوفه بالصدفة في مكان وبالرغم من إنها ماكنتش تعرف عنه أي حاجة إلي إنها من أول مرة شافته فيها وهي عارفة إن هيكون في بينها وبينه حاجة في يوم من الأيام!

- ليا صديق كان عامل انترفيو علشان يختار بنت لوظيفة عنده في الشركة .. وبدل البنت قبل اتنين وفي نهاية اليوم بالصدفة صديق له قاله علي واحدة ممكن تكون جديرة بالوظيفة دي و بمجرد ما سمع اسمها وبالرغم من إن الوظيفة مابقتش موجودة أصلاً إلي أنه قاله خليها تيجي تستلم الوظيفة من بكره! ومن غير حتي انترڤيو ..
ومن أول لحظة شافها فيها حس بحاجة يمكن وقتها ماقدرش يفسرها .. بس فسرها لما اتخطبوا بعد فترة :'))

زمان كانت أكتر حاجة بتشغلني ايه ممكن يكون سر الاحساس اللي يربطك من البداية بشخص غريب عنك!
ايه سر الراحة النفسية اللي ممكن تحسها في بداية معرفتك بيه فتحس إنه هيكون له دور في حياتك!
و ازاي بعد كده مشاعرك كلها ممكن تتوجه ناحيته بشكل تدريجي من غير ما تحس!
ازاي يوم بعد يوم هتحس إنك بقيت مسئول عنه وعن تفاصيل تفاصيل اللي يخصه ..
إيه السر في إنه يوصل في يوم من الأيام لإنه يبقي أغلي عندك منك بعد ما كان كل اللي رابطك بيه إحساس مش مفهوم!
بس اكتشفت اني مهما حاولت مش هوصل لإجابة لأن التفسير الوحيد للمشاعر إن أصلاً مالهاش تفسير :')) ..