[Rena Jesus]

زمان إبن أختى لما كان صغير خالص ،
مسك تليفونى وبوّظه خالص ومش راضى يفتح معايا ، انا كرد فعل إنفعالى بدون وعى منى زعقت فيه جامد ،
فهو خد جنب وفضل باصصلى وفجأه جرى عليا وقالى على فكره انا لما هكبر هاضربك
بكل تلقائيه انا ضحكت ضحك هستيرى على برائته ...

لغاية كدا عادى اللى مش عادى بقى ان تعدى السنين ويكبر ويفضل الموقف ده محفور فى ذاكرته بس مع شوية تغيرات بسيطه ...
من كام يوم فاتوا، فجأه لاقيته بعتلى مسج بيقولى انا اسف ، ولما كلمته قولتله اسف على ايه ، قالى لما زمان بوظتلك التليفون بتاعك ، انا عرفت خلاص انى كنت غلطان ..

الموقف ده علمنى حاجه مهمه جدااااا ، احياناً كتير بنكون فاكرين نفسنا على صواب ومش غلطانين ، وبناخد قرارات حاده وبنفتكرها انها قرارات عين العقل وصح الصح كمان ، لكن تمر الايام ونكبر وأحياناً نندم على القرارات دى وتقول ازاى انا فكرت كدا ، ازاى انا ماسمعتش نصيحة الاكبر منى ، ازاى انا كنت غبى للدرجه دى ...

ببساطه لانك فكرت واعتمدت على عقلك بس، اللى هو خبراته قليله فى الحياه مهما كان عمرك ،
رفضت مساعدتك شخص اكبر منك ،يعتبر جاى من المستقبل ومر بكل التجارب اللى انت هاتمر بيها ...
وجبلك الخلاصه والمفيد فى تجربتك ، الثقه بالنفس شئ جميل لكن الغرور والثقه العمياء بإن رأيك صح وكل الأراء غلط بدون دراسه جيده هو ده الغلط والكارثه فى نفس الوقت ..
مش بقولك كدا عشان تكون إتكالى وتبطل تفكر لا ...

إسمع نصيحة الكبير وإدرسها صح وقارنها بمتطلباتك وإختياراتك وهدفك وطموحك وساعتها قرر ...
عشان ماترجعش تتأسف وتندم وتقول يارتنى كنت سمعت الكلام .

cpd