[walaa farouk]

عجبني مشهد في مسلسل الحصان الاسود
شيري عادل بتحب احمد السقا جدا
رغم انه مش بيحبها لان قلبه مشغول بغيرها
وبالرغم انها عارفه كده الا انها بتحاول تبذل اقصى ما في وسعها علشان تلفت نظره وكمان علشان تثبت برائته من جريمة قتل هو ماعملهاش
لحد ما قالهالها بصراحة ، " ابعدي عن طريقي وشوفي حياتك ، وماتشغليش بالك بيا اكتر من كده ، بصي لمستقبلك واتجوزي وخلفيلك حتة عيل "
كلامه ليها كان الخنجر اللي رشق في قلبها
قالتله بس انا ماستاهلش منك كده
قالها عندك حق ، انتي تستاهلي احسن من كده
فقررت تقبل تتجوز واحد كان بيحبها وبيموت فيها لكنها مكنتش بتحبه ولا فيه مشاعر ليها ناحيته ، والشخص ده اصلا متجوز ومعاه اولاد
وبالرغم من ده كله ، راحتله وقالتله انا موافقه نتجوز
وفعلاً ، اتجوزته عرفي واتقفل عليهم باب واحد
وتاني يوم لما صحيت حست انها خايفه ومرعوبه وقلقانه ، ولما حاول يلمسها زقت ايده من عليها
حست انها ما انتقمتش من فارس " احمد السقا " حست انها انتقمت من نفسها

اوعى تدخل في علاقة لمجرد انك تنتقم من شخص ماقبلش انك تكون في حياته
اوعي تدخل في علاقة مش عارف ابعادها ولا مقتنع بيها
اوعى تورط نفسك بنفسك
لان اللي هاتنتقم من نفسك علشانه مش هايحس بيك ولا هايقدر ده
ووحدك اللي هتدفع التمن
وقت ماتحس انك بتموت بالبطئ مع حد مش حاسس بيك
ابعد خالص عن الكل ، وخد نفس عميق
واستنى لحد ماتتعافى تماما وسم حبه يخرج من دمك
ساعتها هتقدر تقف على رجليك وتقيم العلاقة صح