[Rena Jesus]

لو مش عارف مراتك بتعمل ايه طول اليوم و عندك اطفال كفاية اني اقولك انها بتستحمل الزن
هقولك يعني ايه زن الاطفال لانك كراجل مش بتتعامل معاه الا ساعتين في اليوم تقريبا،
و غير كده في شغلك يا نايم يا مش عايز حد يزعجك فا خارج مع صحابك..

الزن: هي ترددات صوتية بموجات صوتية مختلفة من اول الهمس البسيط المتكرر بماما ماما ماما ماما اللي بتحس فيه ان لابسك عفريت و عمال يزن في ودنك لحد ما بنوصل للصريخ الحيّاني علي اتفه الاسباب..

اسباب الزن بقي:
-بيزن عشان مش بيعرف يطير
- بيزن عشان سبايدر مان مش بييجي يلعب معاه بلعبه
- بيزن عشان افتكر انك مجبتيلوش كاندي من ٨ شهور فا الذكري نقحت عليه دلوقتي
- بيزن عشان اخوه لمس كوبايته بالغلط
- بيلعب فا بيسلي نفسه بالزن
- زهق من اللعب فا بيزود زهقه بالزن
- عايزك تلعبي معاه فا بيزن
- مش عاجبه لعبك عشان مش بتمشي ع الحيط فا بيزن
- عايز ياكل
- مش عايز ياكل
- حران فا بيزن عشان تحميه مثلا
- بردان ف بيزن عشان تلبسيه بيجاما بتاعه باباه
- عايز اخته تلعب معاه
- مش طايق اخته تلعب معاه
- عايز يخرج او يتفرج علي كرتون حافظ حلقاته صم
- عايز يكدّرك
- شايفك هترتاحي فا اتكدر فا بيزن
- مش عارف هو عايز ايه فا بيزن
- تعب من الزن فا بيزن.. معروفة يعني
- بيزن عشان بيتخانق علي فتفوته علي الارض مع اخوه
- بيزن عشان دخلتي التواليت و سبتيه !! انتي اتجننتي باين

الزن ال mono tone المستمر بلا توقف ممكن يخليها تنتحر و ترمي نفسها من الدور العشرين و هى ضميرها مرتاح لان خلايا مخها فقدت القدرة علي السيطرة وبقيت كائن غير سوي نفسياً...

مدة الزن بتتراوح من ١٠ ل ١٢ ساعة يتخللهم عياط او برطمة بدون مبرر بس الحاجة الوحيدة اللي ممكن تديكي امل انهم بيبطلوا زن و هما نايمين...

عشان نقفل الموضوع ده مش بطر علي النعمة بس فعلا لازم الابهات يحترموا تعب الامهات خصوصا في تحملهم الزن اللي بيكون بره البيت و جوه البيت و في النادي و المطعم و عند تيته و الصحاب ...
و الزن بيحلي اوي لو بتتكلم في الموبايل في حاجة مهمه او بتحاسب او بتحاول تفتكر حاجة..

لازم نحترم ضغط الام و ارهاقها من كتر الزن و الطلبات..
حضرتك لو عميل عندك زن عليك مرتين في اتصال ممكن بتقفل موبايلك من الزهق و التوتر و غالبا بيكون الموقف ده قفلك يومك فا بجد مراتك بتعمل كتير و مستحملة كتير اوي... خليك سند ليها عشان متنطش من البلكونة و الابتسامة باظة من وشها ..
ماما_مامي_ماما_مامي
انتِ_بطلة