[Rena Jesus]

يوم 25/5/2017، كنت مسافر انا وصحبى من القاهره للصعيد على طريق الجيش الجديد ،
بس لسوء الحظ العربيه عطلت بينا الساعه 10.15 الصبح ،
نزلنا نحاول نصلحها لكن مافيش فايده أبداً ، سلمنا أمرنا لله ومستنين أى حد يعدى نركب معاه ،
فضلنا قاعدين فى الصحرا لا معانا ميه ولا أكل ولا حتى فى شبكه تقدر تتصل بحد ، جفاف من كله ،
والشمس ناااار جهنم حتى تكيف العربيه فاصل ولو قعدنا فى العربيه هانتشوى من الشمس ...

مكان جبلى مافيش حتى بير تشرب منه .. الغريب بقى فى كل ده ،
إن وسط الرمله والحجاره والجفاف تلاقى نبات عايش ، دا لو ممتش من العطش هايموت من حرارة الشمس الجهنم ،
العجيب فى دا كله ان شكله مش دبلان لا دا شكله قوى وناشف وكأنه بيقول انا أقوى من الطبيعه القاتله دى وقادر أمد جذورى فيها ولا شئ يقدر يوقفنى عن الحياه ...

ساعتها وقفت قدام كلام الملك داود النبى لما قال ..
"ضَرَبَ الصَّخْرَةَ فَجَرَتِ الْمِيَاهُ وَفَاضَتِ الأَوْدِيَةُ" (سفر المزامير 78: 20)

عزيزى القارئ...
مهما كانت ظروف حياتك صعبه وكل حاجه حواليك مضطهداك وعاوزين يكتبوا نهايتك إنهرده قبل بكره ، مهما كان موطنك الحياه فيه شبه مستحيله ....
فوووق وبطل تعيش فى دور الضعيف أنت أقوى بإلهك ، انت قوى بإرادته ،
اللى خلق النبات فى الصحرا ووهب له الحياه والقوه ، اكيد هايديلك حياه وقوه وبركه ونعمه فى حياتك الصعبه وسط الضيقات ، مهما تزيد عليك الضيقه خليك زى الزهره راساها لفوق بتدعى لرب السما ،
أوعى تشتكى للحواليك لانهم صخور ورمال وجبال جافه مافيهمش روح مش هايسمعوك ، ربك وحده قادر يسمعك ويوهبك النعمه والقوه ، قادر يمد جذورك ويثبت مكانك ويقوى مكانتك ..
إفتكر كلام الملك داود النبى لما قال ...
مُلْقِينَ كُلَّ هَمِّكُمْ عَلَيْهِ، لأَنَّهُ هُوَ يَعْتَنِي بِكُمْ.